བདུད་འཇོམས་ཆོས་འབྱུང་གི་གོ་རིམ་སྒྲིག་སྟངས་དང་ས་བཅད་དབྱེ་སྟངས་ལ་ཁྱད་ཆོས་གང་ཞིག་ཡོད་དམ།

རྡོ་རྗེ་ཚེ་སྲུང་གིས།

བདུད་འཇོམས་པའི་སྔ་འགྱུར་ཆོས་འབྱུང་གི་གོ་རིམ་དང་ས་བཅད་དབྱེ་སྟངས་འདི་ངའི་བློ་ངོར་དེ་ཙམ་བདེ་བོ་ཞིག་བྱུང་མ་སོང་། དེ་ཡང་ཆོས་འབྱུང་ཆེན་མོ་འདིའི་འཆད་བྱ་གཙོ་བོ་དེ་དུམ་ཚན་གསུམ་གྱི་ནང་དུ་བསྡུས་འདུག

བཙན་གྱི་སྐོར་གླེང་བ།

རྡོ་རྗེ་ཚེ་སྲུང་གིས་བརྩམས།

བཙན་ནི་འདས་ཟིན་པའི་སྐྱེས་པ་ཁག་གཅིག་གི་རྣམ་ཤེས་རྟ་དམག་གི་རྣམ་པར་གྱུར་པ་ཞིག་ཡིན། བཙན་གྱི་རིགས་ནི་མི་རང་ག་བས་མཐོང་མི་ནུས་མོད་རྟོགས་པ་མཐོ་བའི་གང་ཟག་དང་རྒྱུ་རྐྱེན་ཅི་ཡིན་མི་ཤེས་ཀྱང་སྐབས་ལ་ལར་མི་གསོན་པོ་ཁ་ཤས་ཤིག་བཙན་གྱིས་ཁྲིད་ནས་ཉིན་ཤས་རིང་བོར་བརླགས་སུ་འགྲོ་བ་ཡོད་ཅིང་སྐབས་དེར་བཙན་གྱིས་ཁྲིད་པའི་མི་དེས་བཙན་མཐོང་ནུས།

མདོ་ཁམས་སུ་ཀློང་ཆེན་སྙིང་ཐིག་གི་ཁྲིད་ལུང་བརྒྱུད་པ་ཁྱབ་འཕེལ་བྱུང་ཚུལ།

གཏེར་སྟོན་གྲུབ་ཐོབ་ཡོངས་ཀྱི་རྒྱལ་པོ་རིག་པ་འཛིན་པ་འཇིགས་མེད་གླིང་པ་མཆོག་མདོ་ཁམས་སྨད་ཀྱི་ལྗོངས་ཆེན་པོ་འདིར་ཆིབས་ཁ་བསྒྱུར་བའི་རྟེན་འབྲེལ་མ་འགྲིགས་ན་ཡང་ཀློང་ཆེན་སྙིང་ཐིག་གི་བརྒྱུད་པ་རིན་པོ་ཆེ་མདོ་ཁམས་ཕྱོགས་སུ་དར་ཁྱབ་ཆེན་པོ་བྱུང་།

ཀརྨ་པས་མ་ཧཱ་ཡ་ན་དང་ཐེ་ར་ཝ་དྷ་གཉིས་མཉམ་འབྲེལ་གྱི་གཞི་འདིངས་དགོས་ཞེས་གསུངས་འདུག

འབྲས་ལྗོངས་སུ་འཁྲུངས་པའི་བཙུན་པ་མ་ཧེན་དྷ་ཐེ་ར་མཆོག

དེ་ཡང་ས་ག་ཟླ་བའི་དུས་ཆེན་ཉིན་མོར་རྒྱ་གར་རྒྱལ་ཡོངས་འགྲེམ་སྟོན་ཁང་དུ་ཀརྨ་པ་ཕྲིན་ལས་མཐའ་ཡས་རྡོ་རྗེ་དང་ཤྲི་ལང་ཁའི་ཆེས་མཐོའི་གཞུང་ཚབ་དོན་གཅོད་སློབ་སྟོན་པ་སོགས་ཀྱིས་གལ་གནད་ཆེ་བའི་གསུངས་བཤད་གནང་འདུག

ཕྱིར་དྲན་ཁྲོད་ཀྱི་བལ་ཡུལ།

རྡོ་རྗེ་ཚེ་སྲུང་གིས།

 ཞོགས་པ་དེར་སྨུག་སྤྲིན་སྟུག་པོ་ཞིག་གིས་བལ་ཡུལ་གྱི་རྒྱལ་ས་སྟེ་གྲོང་ཁྱེར་ཀ་ཊ་མན་དུ་ཡོངས་རྫོགས་བཀབ་འདུག

ཤྲི་ལང་ཁར་སངས་རྒྱས་ཀྱི་བསྟན་པའི་དབུ་བརྙེས་པའི་དུས་དྲན་བསྲུང་བརྩི་བྱེད་བཞིན་འདུག

གྲོང་ཁྱེར་དབུས་ཀྱི་མཆོད་རྟེན་གློག་སྒྲོན་གྱིས་བརྒྱན་པ།

ཤྲི་ལང་ཁའི་གནས་མཆོག་གྲོང་ཁྱེར་ཨ་ནུ་ར་དྷ་པུ་ར་རུ་ནང་པ་སངས་རྒྱས་པའི་ཆོས་དང་འབྲེལ་བའི་དུས་ཆེན་ཞིག་ཚུགས་འདུག

དེ་ཡང་དུས་ཆེན་འདི་ནི་ཕྱི་ཟླ་༦པའི་ཚེས་༡༣་ནས་༡༨བར་ཡིན། དུས་ཆེན་འདི་ནི་རང་རེ་བོད་ལུགས་ཀྱི་ས་ག་ཟླ་བའི་ཚེས་༡༥ཉིན་མོར་ཁེལ་ཡོད་ཅིང་དུས་ཆེན་གྱི་མིང་ལ་ཕོ་སོན་ཟེར། དུས་ཆེན་འདི་ནི་གླིང་ཕྲན་འདིར་སངས་རྒྱུས་ཀྱི་བསྟན་པ་རིན་པོ་ཆེ་དར་བའི་མགོ་ཐོག་མར་ཚུགས་པའི་དུས་དྲན་ཡིན། དེ་ཡང་ད་ནས་ཡར་བརྩིས་པའི་མི་ལོ་༢༣༡༧ཙམ་འདས་པའི་ཟླ་ཚེས་འདིར་ཡུལ་དེར་སངས་རྒྱས་པའི་བསྟན་པ་དར་བའི་མགོ་ཚུགས་རེད། དེ་ཡང་ད་ལོར་དུས་ཆེན་འདིའི་སྐབས་སུ་དད་ལྡན་མི་གྲངས་ས་ཡ་གསུམ་ཡས་མས་འཛོམ་པའི་ཚོད་དཔག་བྱེད་ཀྱིན་ཡོད་ཟེར། ཡུལ་དེའི་སྲིད་འཛིན་དང་སྲིད་སྐྱོང་རྣམ་པ། ཆེས་མཐོའི་དཔོན་རིགས་མང་པོ་ཡང་དུས་ཆེན་འདིར་ཚོགས་ཞུགས་བྱ་འཆར་ཡོད། སྐབས་འདིར་དྲག་རྩལ་སྦྱོང་བརྡར་ཡོད་པའི་ཉེན་རྟོག་སྐོར་སྲུང་མི་སྣ་༤༠༠༠ཙམ་གྱིས་བདེ་འཇགས་སྲུང་སྐྱོབ་བྱེད་བཞིན་ཡོད་འདུག

འདྲ་པར་གྱི་ཡོང་ཁུངས་www.lankapage.comཡིན།

ཕྱིར་དྲན་ཁྲོད་ཀྱི་བལ་ཡུལ།

རྡོ་རྗེ་ཚེ་སྲུང་གིས་བརྩམས།

ང་བལ་ཡུལ་དུ་སྡོད་པའི་རིང་ལ་གནས་ཚུལ་ཁྱད་མཚར་ཁ་ཤས་ཤིག་མཐོང་བའི་ནང་ནས་གཅིག་ནི་རང་རེ་བོད་ཀྱི་སྤྲུལ་སྐུ་ངོས་འཛིན་དང་ལྷ་འབེབས་པ་སོགས་དང་ཆ་འདྲ་བའི་ལྷ་མོ་ངོས་འཛིན་སྲོལ་དེ་རེད།

ལྷ་མོ་དེའི་མིང་ལ་ཀུ་མ་རིའམ་ཀུ་མ་རི་དྷེ་ཝི་ཟེར། ཀུ་མ་རི་ཟེར་བ་དེ་སྤྱིར་བཏང་གིས་གྲོང་ཆོས་ཀྱིས་མ་གོས་པའི་བུད་མེད་ཀྱི་མིང་ཡིན་མོད་དམིགས་བསལ་གྱི་ལྷ་མོ་དུརྒའི་མཚན་ཡིན་ཟེར། ཀུ་མ་ར་དང་ཀུ་མ་རི་ནི་བོད་སྐད་དུ་གཞོན་ནུ་དང་གཞོན་ནུ་མར་བསྒྱུར་འདུག དེ་ཡང་བལ་ཡུལ་གྱི་གྲོང་ཁྱེར་མང་པོར་ལྷ་མོ་དུརྒའི་སྐུ་རྟེན་རེ་ཡོད་ཀྱང་སྐད་གྲགས་སམ་གལ་གནད་ཆེ་ཤོས་དེ་ནི་རྒྱལ་པོ་ཚང་གི་མཆོད་གནས་ཀུ་མ་རི་དེ་རེད། ལྷ་མོའི་སྐུ་རྟེན་ལྟ་བུ་དེ་འདེམས་སྟངས་ལ་ཆོས་ལུགས་ཀྱི་ཆོ་ག་དང་བརྟག་ཐབས་མང་པོ་ཞིག་བརྒྱུད་དགོས་ཟེར། ངེས་པར་དུ་ཡང་བུ་མོ་གཞོན་ནུ་མ་མཚན་བཟང་པོ་སུམ་ཅུ་རྩ་གཉིས་ཚང་བ་ཞིག་དགོས། ནེ་ཝ་རིའི་རིགས་ཀྱི་ནང་ཚན་ཤཱཀྱའི་རིགས་ལས་བྱུང་བ་ཞིག་དགོས། ནད་གཞི་ཚབ་ཆེན་མེད་པ་ཞིག་དགོས། ལུས་ལས་ཁྲག་མང་པོ་བཞུར་མ་མྱོང་བ་ཞིག་དགོས་པ་སོགས་འོས་ཆོས་ཀྱི་རྣམ་གྲངས་རིང་པོ་ཞིག་འདུག

དེ་ཡང་བལ་ཡུལ་གྱི་ཧིན་དྷུའི་རྗེས་འབྲངས་བ་དང་ནང་པ་མང་པོས་ཀྱང་གུས་ཤིང་མཆོད་གནས་སུ་འཛིན། ངས་སྐབས་དེར་ལྷ་མོའི་སྐུ་རྟེན་དེ་མཇལ་བའི་འབད་པ་ཐེངས་མང་བྱས་ཀྱང་དོན་འབྲས་ཐོན་མ་སོང་། རྒྱལ་པོ་ཚང་གི་མཆོད་གནས་སྐུ་རྟེན་དེའི་བཞུགས་གནས་ལ་ཀུ་མ་རིའི་སྒར་ཟེར་ཞིང་བལ་ཡུལ་རྒྱལ་ས་རྙིང་པའི་དབུས་སུ་ཕོ་བྲང་ཆེན་པོ་ཞིག་འདུག ཉིན་ཞིག་ལ་སྔོན་ནས་གྲ་སྒྲིག་བྱས་པ་བཞིན་ལྷ་མོའི་ཕོ་བྲང་དུ་བཅར་ཐུབ་སོང་། སྐབས་དེར་ང་གཅིག་པོ་མ་རེད། རྒྱ་གར་བ་དང་། བལ་པོ། ཕྱི་གླིང་པ་བཅས་མི་མང་པོ་ཞིག་ཡོད། ལྷ་མོའི་ཉེ་གནས་ཀྱིས་ང་ཚོར་ཕོ་བྲང་དབུས་ཀྱི་ར་སྐོར་ནང་དུ་སྒུག་བཅུག་སོང་། མི་འགྱང་བར་ཤིང་བརྐོས་འབུར་རིས་གཏིང་ཟབ་མོ་ཅན་གྱི་སྒེའུ་ཁུང་ཞིག་གི་ནང་ནས་བུ་མོ་ཆུང་ངུ་གྱོན་ཆས་དམར་པོ་གྱོན་མཁན་ཞིག་གི་གདོང་པ་ཕྱིར་མངོན་བྱུང་། ཡར་བལྟས་ཚོད་ལ་ངོ་ལྔ་ཟིན་ཙམ་ལོས་ཡིན་སྙམ་པ་ཞིག་འདུག མོའི་གདོང་པ་ཆུང་ཆུང་དེའི་མིག་གི་སྟེང་ནས་ཡར་རི་མོ་ནག་པོ་སྦོམ་པོ་ཞིག་སྨིན་མའི་ཚུལ་དུ་ཐོད་པའི་སྟེང་དུ་བྲིས་འདུག ང་ཚོས་ལག་པས་ཐལ་མོ་སྦྱར་ནས་ན་མ་སི་ཏེ་ཞེས་བརྗོད་ནས་མགོ་བསྒུར་བ་ཡིན། བུ་མོ་ཆུང་ཆུང་དེས་འཛུམ་བསྟན་ནས་ཅུང་ངོ་ཚ་བའི་ཉམས་ཀྱིས་ལག་པ་ཡར་བཀྱག་ནས་གཡུག་གཡུག་ཅིག་བྱས་ནས་ཕར་འཁོར་སོང་། དེ་ནས་ཕྱིར་ང་ཚོའི་མིག་ལམ་ལ་གཏན་ནས་མངོན་མ་སོང་། ངའི་རེ་བ་ཚང་མ་སྟོང་ཟད་དུ་ཕྱིན་སོང་།

ཡིན་ན་ཡང་ངས་བློས་མ་བཏང་བར་འབད་བརྩོན་གྱི་བསམ་བློ་བཏང་། ག་ཚོད་བསམ་ན་ཡང་ལྷ་མོའི་ཉེ་སར་བཅར་བའི་ཐབས་བཀོད་ཅིག་མི་འདུག དེར་ངས་ཐབས་ལམ་གཞན་ཞིག་སེམས་ལ་འཁོར། དེ་ནི་སྔོན་དུ་སུ་ལྷ་མོའི་སྐུ་རྟེན་བྱེད་མྱོང་མཁན་གྱི་སྐུ་རྟེན་ཟུར་བ་ཞིག་ལ་མཇལ་ཐབས་བྱ་རྒྱུ་དེ་རེད། དེར་ངས་བཙལ་བཙལ་བའི་ཐ་མ་ལ་ར་ཤི་མིས་ལ་ཤཱཀྱ་ཟེར་བའི་ལྷ་མོའི་སྐུ་རྟེན་ཟུར་པ་ཞིག་རྩད་ཆོད་སོང་། གྲོགས་པོ་ཞིག་གིས་གྲོགས་པོ་གཞན་ཞིག་བརྒྱུད། དེའི་གྲོགས་པོ་ཞིག་ལྷ་མོའི་སྐུ་རྟེན་ཟུར་པ་དེའི་གཉེན་ཚན་དུ་གཏོགས་པ་ཞིག་ཡིན་འདུག་པས་ངས་ཁོང་ཚོར་གསོལ་སྟོན་ཐེངས་གཉིས་གསུམ་ཞིག་བཤམ་རྗེས་སུ་སྐུ་རྟེན་ཟུར་པ་མཇལ་ཐབས་བྱེད་པར་ཁས་བླངས་སོང་། ཕྱི་ལོ་༢༠༠༢པའི་ཟླ་༣པའི་ཚེས་གཅིག་ཉིན་གྱི་ཞོགས་པར་ངའི་བལ་བོ་གྲོགས་པོ་པུར་ཀ་ཤི་ཤཱཀྱ་ཡིས་ཁ་པར་འབྱོར་སོང་། དེར་ཁོས་ར་ཤི་མི་ལ་ཤཱཀྱའི་ཁྱིམ་ཚང་གི་ཁང་པ་རྒྱལ་ས་རྙིང་པའི་དཀྱིལ་ན་ཡོད་པས་དེར་ཤོག་ཟེར། ང་གླ་འཁོར་ཞིག་ལ་བསྡད་ནས་ཕྱིན། རྒྱལ་ས་རྙིང་པར་ངེད་གཉིས་ཐུག དེར་ཁོས་ང་ལ་དགོས་འདུན་གཉིས་བཏོན་བྱུང་། གཅིག་ནི་ལྷ་མོའི་སྐུ་རྟེན་ཟུར་པ་ར་ཤི་མི་ལ་ལ་ལག་རྟགས་བརྔན་པ་ཞིག་སྤྲོད་དགོས་པ་དང་། གཉིས་ནས་མོར་མ་འོངས་པར་ཆང་ས་རྒྱག་འདོད་ཡོད་མེད་སྐོར་གཏན་ནས་མ་འདྲི་ཟེར་བ་དེ་རེད། དེར་ངས་ལག་རྟགས་རྔན་པ་ལྟ་བུར་པ་ཤི་མེ་ནའི་རྐེ་དཀྲིས་དམར་པོ་ཆུང་ཆུང་ཞིག་ཉོས་ནས་མོའི་ཁང་པར་འཛུལ།

ར་ཤི་མིས་ལ་ཤཱཀྱ་ནི་ཁང་པ་བཟོ་སྟངས་རྙིང་པ་ཤེལ་ཁྲ་མེད་པའི་སྒེའུ་ཁུང་གི་མཐའ་རུ་ཤིང་བརྐོས་འབུར་རིས་ཡོད་པ་ཞིག་གི་ནང་དུ་བསྡད་འདུག སྲང་ལམ་དོག་པོ་དེ་ནས་ཡར་བྱིས་པའི་རྩེད་དགོད་ཀྱི་ཀུ་ཅོས་ཁང་མིག་དེའི་ལྷིང་འཇགས་དཀྲོག་ཡོང་གི་འདུག མོས་ཀུར་ཏ་ཞེས་པའི་བུད་མེད་ཀྱི་གྱོན་གོས་དཀྱུས་མ་དང་དེ་དང་ཆ་འགྲིགས་ཀྱི་སྨད་གོས་དོར་མ་ལྷུག་ལྷུག་ནག་པོ་ཞིག་གྱོན་འདུག ཁང་པའི་གྱང་ངོས་སུ་མོ་རང་ལྷ་མོ་དུརྒའི་སྐུ་རྟེན་ཡིན་སྐབས་ཀྱི་ཆ་ལུགས་རྒྱན་ཆས་གསེར་གྱི་དབུ་རྒྱན་ཆེན་པོ་དང་། རིན་པོ་ཆེའི་སྟོད་རྒྱན་འབར་འབུར་ཅན། ཐོད་པ་ལ་ཚོན་དམར་པོས་བྱུགས་པའི་དབུས་སུ་གསེར་གྱི་སྤྱན་མིག་བྲིས་པ་སོགས་བརྗིད་ཉམས་དང་རྒྱས་སྤྲོས་ཆེ་བའི་འདྲ་པར་ཆེན་པོ་ཞིག་པར་སྒྲོམ་ནང་དུ་བཤམ་འདུག

དེར་མོ་རང་ལྷ་མོའི་སྐུ་རྟེན་དུ་ཅི་ལྟར་གྱུར་ཚུལ་གླེང་བྱུང་། ར་ཤི་མི་ལ་བྱིས་པ་དཀྱུས་མ་ཞིག་ཡིན་ཡང་ཕྱི་ལོ་༡༩༨༤ལོར་རྒྱལ་པོའི་མཆོད་གནས་ལྷ་མོའི་སྐུ་རྟེན་དེའི་རང་གི་དུས་ཚོད་ཡོལ་ལ་ཉེ་བའི་རྟགས་བསྟན། ལྷ་མོའི་སྐུ་རྟེན་ཉེ་གནས་ཀྱི་དེ་ལུགས་རྒྱལ་ཁང་གི་མཆོད་གནས་བྲམ་ཟེ་ཚོར་སྙན་ཞུ་ཕུལ། བྲམ་ཟེ་ཚོས་སྐབས་དེའི་རྒྱལ་པོ་བྷི་རན་དྷ་ར་ལ་ཞུས། རྒྱལ་པོའི་ཕོ་བྲང་གི་སྐར་རྩིས་པ་ཚོས་བཀྲ་ཤིས་པའི་ཉི་མ་ཞིག་བདམས་ནས་ལྷ་མོའི་སྐུ་རྟེན་འདེམས་པའི་འཆར་གཞི་བཏིང་ནས་རྩད་འཚོལ་གྱི་མགོ་བཙུགས།

ལྷ་མོའི་སྐུ་རྟེན་གྱི་ཉེ་གནས་ཇུ་ཇུ་བྷའེ་ཞེས་པ་དེ་ར་ཤི་མིས་ལའི་མ་དང་ཐུག་ནས་མོའི་ལོ་བཞི་ལ་སོན་པའི་བུ་མོ་དེ་འོས་གཞིའི་ནང་དུ་ཞུགས་དགོས་སྐོར་བརྗོད། དེ་ནས་གང་ཞིག་བྱུང་མིན་སྐོར་མོས་དྲན་གྱིན་མི་འདུག་ཟེར། བརྗོད་འདོད་མེད་པ་ཡིན་ནམ་གང་ལྟར་ཡང་འོས་འདེམས་ཀྱི་བརྒྱུད་རིམ་ཞིབ་པར་གླེང་མ་སོང་། ཡིན་ན་ཡང་ངས་ཕྱི་རྒྱལ་བ་སྐར་རྩིས་རིག་པ་བ་དང་ལྷ་མོའི་སྐུ་རྟེན་སྐོར་ལ་ཆེད་སྦྱོང་བྱ་མྱོང་མན་ཞིག་ལ་འདྲི་རྩད་བྱས་པར་ཁོས་འདི་ལྟར་བཤད་བྱུང་། ལྷ་མོ་འོས་འདེམས་ཀྱི་བརྒྱུར་རིམ་ནི་ཐོག་མར་རྒྱལ་ཁང་གི་མདུན་ན་འདོན་ཞེས་པའི་བྲམ་ཟེར་དང་སྐར་རྩིས་པ་ཚོས་ལྷ་མོའི་འོས་གཞི་ཚང་མ་ཕོ་བྲང་རྙིང་པའི་ནང་དུ་བཀུག ལུས་ལ་མཚན་སུམ་ཅུ་རྩ་གཉིས་ཚང་མིན་སོགས་བརྟག སྐར་རྩིས་པ་ཚོས་བུ་མོ་དེའི་སྐྱེས་པའི་སྐར་མ་དེ་སྐབས་དེའི་རྒྱལ་པོའི་སྐར་མ་དང་མཐུན་མིན་བརྟག ད་དུང་དེ་ཙམ་གྱིས་འགྲིགས་སོང་བ་ཞིག་ག་ལ་ཡིན། ཆེས་གསང་བའི་བརྟག་ཐབས་དེ་ནི་དྷ་ཤེན་ཞེས་པའི་དུས་ཆེན་གྱི་ཉིན་བརྒྱད་པར་བུ་མོ་ཆུང་ཆུང་དེ་ཕོ་བྲང་རྙིང་པའི་ར་སྐོར་ཆུང་ངུ་ཞིག་ཏུ་ཁྲིད། དེར་དམར་མཆོད་ཀྱི་ཆོ་ག་ཆེན་པོ་བྱས། ར་དང་། མ་ཧེ་དང་། བྱ་དེ་སོགས་སྲོག་ཆགས་མང་པོ་ཞིག་བསད་ནས་དྲགཏུ་ཁྲོས་པའི་ལྷ་མོ་དརྒ་ལ་མཆོད་པ་བྱ། སྐབས་དེར་ར་སྐོར་ཆུང་ངུ་དེར་འོད་ཀྱི་གསལ་ཆ་ཆུང་ཞིང་གང་སར་ཁྲག་གིས་གོས་ཡོད་པས་བྱིས་པ་ཕལ་པ་ཚོར་སྐྲག་སྣང་འབྱུང་ངེས་པ་ཞིག་ཡིན། ལྷ་མོའི་སྐུ་རྟེན་ལ་འོས་པའི་བྱིས་པ་དེས་འཇིགས་པའི་རྣམ་འགྱུར་མི་སྟོན་པ་དེ་ནི་ཤ་ལ་དགའ་ཞིང་ཁྲག་ལ་རྔམ་པའི་ལྷ་མོ་དུརྒ་ཞུགས་ཟིན་པའི་རྟགས་ཡིན་པས་སྐུ་རྟེན་ལ་འོས་པར་ཐག་གཅོད་པ་ཡིན་ཟེར།

ར་ཤི་མིས་ལའི་ཁང་པའི་རྩིག་ངོས་སུ་པར་རིས་འདྲ་མིན་མང་པོ་སྦྱར་འདུག མོ་རང་སྐབས་དེར་ལོ་ཉེར་གཉིས་ཟིན་འདུག་ཅིང་གདོང་པ་མཛེས་པོ་དང་ཡང་ནས་ཡང་དུ་འཛུམ་མདངས་སྟོན། ལྷག་པར་ཡང་མོ་རང་ལྷ་མོའི་སྐུ་རྟེན་ཡིན་སྐབས་ཀྱི་གནས་ཚུལ་གླེང་སྐབས་གད་མོ་དང་འཛུམ་མདངས་སྦྲགས་ནས་བཤད། ང་ལོ་བཞི་ཡིན་པའི་དུས་ནས་ང་ནི་ཀུ་མ་རི་ཡིན་པ་དང་ང་ལ་དམིགས་བསལ་གྱི་ནུས་པ་ཞིག་ཡོད་པའི་ཚོར་བ་འདུག དེ་ཡང་ང་ནི་དམིགས་བསལ་བ་ཞིག་ཡིན་སྟབས་མི་ཚང་མས་ང་ལ་གུས་བརྩི་དང་ལོ་ན་རྒན་པ་ཚོས་ཀྱང་གུས་བརྩི་བྱེད་པས་ང་རང་ནི་མི་གཞན་དང་མི་འདྲ་བ་ཞིག་ཡིན་བསམ་གྱིན་ཡོད། ལྷག་པར་ཡང་རྒྱལ་པོ་ང་མཇལ་དུ་ཡོང་བ་དེས་ང་ལ་ནུས་པ་ཆེན་པོ་ཞིག་ཡོད་པར་ཚོར་གྱིན་ཡོད། ངའི་ཉིན་རེའི་བྱེད་སྒོ་དེ་ནི་དེ་ཙམ་བྲེལ་བ་ཆེ་བ་ཞིག་མིན། ཞོགས་པ་ཆུ་ཚོད་དྲུག་པའི་སྟེང་ནས་ཆོས་ཀྱི་ཆོ་ག་བྱེད་དུ་འགྲོ། ཆུ་ཚོད་དགུ་པ་ནས་བཅུ་པའི་བར་དུ་དགེ་རྒན་ཞིག་གི་དྲུང་དུ་བལ་པོའི་སྐད་ཡིག་དང་། དབྱིན་ཡིག རྩིས་རིག་གི་རྨང་གཞི་སློབ་ཁྲིད་བྱེད། སྐབས་དེར་སློབ་སྦྱོང་འཛིན་གྲ་ཆུ་ཚོད་གཅིག་ལས་མེད་ཀྱང་དེང་སང་ཆུ་ཚོད་གསུམ་གྱི་དུས་ཚོད་བཟོས་ཡོད་ཟེར།

གལ་སྲིད་ང་ལ་མཇལ་འཕྲད་བྱེད་མཁན་ཡོད་ན་ང་སྒེའུ་ཁུང་འགྲམ་དུ་འགྲོ་དགོས། མཇལ་འཕྲད་བྱེད་མཁན་ནི་ས་གནས་མི་མང་དང་ཕྱིའི་ལྟ་སྐོར་བ་མང་པོ་ཡོད། ལྷག་པར་ཡང་བྱིས་པ་ཆུང་ངུ་སྐད་ཆ་བཤད་མི་ཐུབ་པའི་སྐྱོན་ཡོད་པ་ཚོ་ཕ་མས་ཁྲིད་ནས་ང་ལ་དམིགས་བསལ་གྱི་བྱིན་བརླབ་ཞུ་བར་ཡོང་། དེ་ཚོ་ང་ལ་མཇལ་དུ་ཡོང་སྐབས་ཉིན་སྔ་མོ་ནས་ཕ་མ་བསྙུང་གནས་ལ་བསྡད་དེ་བྱིས་པ་ཁྲིད་ཡོང་དགོས། བྱིན་བརླབ་ཞུ་སྟངས་ནི་ཆུ་གཙང་མ་ཞིག་གིས་ངའི་རྐང་བ་བཀྲུས་ནས་ཆུ་དེ་སྣོད་ཀྱི་ནང་དུ་ཉར་ཞིང་བྱིས་པ་དེའི་ཁར་བླུད་དགོས་པ་རེད། དེ་ཡང་ཐེངས་ཁ་ཤས་ཤིག་ལ་ནུས་པ་ཡག་པོ་ཐོན་སོང་། ད་དུང་ངས་དྲན་པ་ཞིག་ལ་བྱིས་པ་ཞིག་གི་མིག་ལ་སྐྱོན་འདུག དེ་ཡང་བྱིསཔ་དེའི་མིག་ཡག་པོར་ཕྱེ་ཐུབ་ཀྱིན་མི་འདུག ངའི་རྐང་བ་བཀྲུས་པའི་ཆུ་དེ་བྱིས་པའི་མིག་ལ་བྱུགས་ཤིང་ཁར་བླུད་པའི་བྱིན་བརླབ་ཀྱིས་དྲག་སྐྱེད་ཡག་པོ་བྱུང་སོང་། དེ་ཡང་ཐེངས་གཅིག་གིས་ནུས་པ་ཐོན་པ་ཞིག་མ་རེད། ཉིན་ནས་ཉིན་མཐུད་དེ་འབད་ནས་རིམ་གྱིས་ཇེ་བཟང་དུ་ཕྱིན་པ་མཐོང་བས་ང་ཧ་ཅང་དགའ་བྱུང་། ང་རང་ཉིད་ལྷ་མོ་དངོས་གནས་ཤིག་ཡིན་པའི་ཚོར་སྣང་འདུག་ཟེར།

སྐབས་དེར་ར་ཤི་མི་ལའི་ཨ་མ་དེས་འཕྱར་གཟན་ནག་པོ་ཞིག་དཀྲིས་ནས་ཁང་པའི་ནང་དུ་འཛུལ་བྱུང་། ལག་གཉིས་ཐལ་མོ་སྦྱར་ནས་ན་མ་སི་ཏེ་ཟེར་ནས་ང་ལ་མཚམས་འདྲི་བྱས། དེར་ངས་མོ་ལ་ཁྱེད་ཀྱི་བུ་མོ་དེ་ལྷ་མོར་གྱུར་སྐབས་སུ་ཐོག་མར་ག་འདྲ་ཞིག་རེད་ཅེས་དྲིས། མོས། ངས་རང་གི་བུ་མོ་ཞིག་ཡིན་པ་ལྟ་བུར་གཏན་ནས་བཟུང་མེད། ང་ལ་ལྷ་མོ་ཀུ་མ་རི་དངོས་ཡིན་པའི་ཚོར་སྣང་བྱུང་ཟེར།

སྐབས་དེར་བུད་མེད་ན་གཞོན་གཞན་ཞིག་ཁང་པའི་ནང་དུ་འཛུལ་ནས་ཁུ་སིམ་མེར་ལོགས་ཤིག་ཏུ་སྡོད་ཀྱིན་འདུག དེར་ངས་བུད་མེད་དེ་ནི་ར་ཤི་མིས་ལའི་སྲིང་མོ་རྒན་པ་དེ་ཡིན་པ་ཤེས། དེར་ངས་ཁྱེད་ཀྱི་སྲིང་མོ་ཆུང་ཆུང་ལྷ་མོར་གྱུར་སྐབས་ག་འདྲ་བྱུང་མིན་སྐོར་དྲིས། མོས། ར་ཤི་མི་ལས་གྱོན་ཆས་དམར་པོ་གྱོན་སོང་། སྐྲ་བསླས་སྟངས་བརྗེས་སོང་། མི་ཚང་མས་ཁྱོད་ཀྱི་སྲིང་མོ་ཆུང་ཆུང་དེ་དེ་རིང་ནས་ལྷ་མོར་གྱུར་པ་རེད་ཟེར། ཉིན་དེའི་ཞོགས་པར་མོ་རང་ངའི་སྲིང་མོ་ཆུང་ཆུང་དེ་རེད། ཡིན་ན་ཡང་ང་སློབ་གྲྭར་སོང་ནས་ཕྱིར་ཁྱིམ་དུ་སླེབས་སྐབས་ལྷ་མོར་གྱུར་ཚར་འདུག ཡིན་དང་ཡིན། ངས་ཀྱང་མགོ་བོ་སྒུར་སྒུར་གྱིས་གུས་འདུད་བྱས་པ་ཡིན་ཟེར།

ཡང་བསྐྱར་ར་ཤི་མིས་ལས་གཏམ་གླེང་མཇུག་བསྐྱངས། ལོ་འཁོར་གཅིག་གི་རིང་གི་ངའི་དུས་ཚོད་སྤྲོ་སྣང་ཆེ་ཤོས་དེ་ནི་ཨིན་དྲ་ཅ་ཏྲ་ཞེས་པའི་དུས་ཆེན་དེ་ཡིན། ངའི་ཞལ་ཏ་མ་ཚོས་ཆུ་ཚོད་གཅིག་ཙམ་གྱི་རིང་ལ་ངའི་གདོང་མཛེས་བཟོ་དང་གྱོན་གོས་རྒྱན་ཆས་སྤྲས། དེ་ནས་ང་ཁྱོགས་ཁྲིར་སྡོད། ར་མ་ནག་པོ་ཞིག་དམར་མཆོད་དུ་ཕུལ་ནས་ཁྲག་ཐིག་རྣམས་ཁྱོགས་ཀྱི་སྟེང་ལ་བྲན། དེར་མཆོད་པའི་ཆོ་ག་བྱེད་སྐབས་སུ་མཆོད་པའི་ཡོ་བྱད་མེ་ཏོག་དང་། ཤིང་ཏོག མཚལ་དམར་སོགས་རྒྱལ་པོའི་ཕོ་བྲང་ནས་འབྱོར་ཡོང་། སྤྲོ་སྣང་ཆེ་ཤོས་དེནི་ང་རྒྱུན་དུ་ཀུ་མ་རིའི་སྒར་ཞེས་པའི་ཕོ་བྲང་ལས་ཕྱིར་ཐོན་མི་ཆོག་ན་ཡང་དུས་ཆེན་དེའི་ཉིན་བཞིའི་རིང་ལ་ཕྱི་ལོགས་སུ་ཐོན་ནས་དུས་ཆེན་ལ་ཞུགས་ཤིང་རྒྱལ་པོ་དེར་ཕེབས་ཤིང་ངས་ཁོང་གི་དབུ་ཐོད་ལ་མཚལ་དམར་གྱི་ཐིག་ལེ་འགོད་དགོས་པ་རེད།

ཕྱི་ལོ་༡༩༩༢ལོར་ར་ཤི་མིས་ལ་ལྷ་མོའི་སྐུ་རྟེན་གྱི་དུས་ཚོད་ཡོལ། སྐབས་དེར་མོ་ལོ་ན་བཅུ་གཉིས་སུ་སླེབས་ཤིང་ཐོག་མའི་ཟླ་མཚན་བབ། ལྷ་མོའི་སྐུ་ལས་མི་གཙང་བའི་རྟགས་མཚན་བསྟན་པ་དང་ལྷ་མོའི་སྐུ་རྟེན་གྱི་དུས་ཚོད་ཡོལ་བ་རེད། དེ་ཡང་ལུས་ཀྱི་ཁྲག་ཤོར་བ་ནི་དུས་ལས་ཡོལ་བའི་རྟགས་མཚན་ངོ་མ་དེ་རེད། སྐབས་དེར་ང་ལ་སེམས་ཚོར་སྣ་ཚོར་འདྲེས་མར་སྐྱེས་བྱུང་། ངས་མི་ལོ་བརྒྱད་ཀྱི་དུས་ཚོད་བསྐྱལ་སའི་ཀུ་མ་རིའི་སྒར་ལས་ཕྱིར་ཐོན་དགོས་པ་དེ་རེད། ང་ལ་རང་ཉིད་ཀྱི་ཕ་མ་ཡོད་ཅིང་ངའི་ཕ་མ་གཉིས་ང་དང་འཕྲད་དུ་ནམ་ཞིག་ལ་ཡོང་ཡང་ཆོག་མོད་ཁོང་ཚོ་ཀུ་མ་རིའི་སྒར་དུ་ཞག་སྡོད་བྱེད་མི་ཆོག་པས་ངེད་ཚོའི་འབྲེལ་བ་དེ་ཙམ་ཉེ་བོ་ཞིག་མིན། ངའི་ཉེ་གནས་སམ་ཞལ་ཏ་བ་དེ་དག་ངའི་ཕ་མ་དངོས་གནས་ལྟ་བུའི་མཛའ་སེམས་ཞིག་ཡོད་པས་ཁོང་ཚོ་དང་ཁ་བྲལ་ནས་རང་གི་ཕ་མའི་གམ་དུ་ལོག་པར་སེམས་མི་བདེ་བ་ཞིག་འདུག ཀུ་མ་རིའི་སྐུ་རྟེན་གསར་པ་དེ་ཀུ་མ་རིའི་སྒར་དུ་ཁྲིད་ནས་སླེབས་བྱུང་། ང་ཚོ་མཉམ་དུ་བསྡད། མཆོད་པ་དང་ཆོ་ག་མཉམ་དུ་བྱས། དེ་ནས་ཀུ་མ་རི་གསར་པ་དེ་ངའི་ཚབ་དུ་བཞག་ནས་ང་ཕྱིར་རང་གི་ཕ་མའི་ཁྱིམ་དུ་ཁྲིད་སོང་ཟེར།

སྐབས་དེར་མོའི་སྲིང་མོ་ཕ་ར་མིས་ལ་ད་དུང་ཡང་ཁང་མིག་དེའི་གྲུ་ཟུར་གཞན་ཕྱོགས་སུ་བསྡད་འདུག མོས་གླེང་མོལ་གྱི་མཇུག་མཐུད་སོང་། ར་ཤི་མིས་ལ་ཕྱིར་ཁྱིམ་དུ་འབྱོར་བའི་ཐོག་མའི་ཆར་རང་ཁྱིམ་གྱི་འཚོ་བར་གོམས་འདྲིས་ཡོང་བར་ཡུན་རིང་པོ་འགོར་སོང་། མོ་རང་ཀུ་མ་རི་ཡིན་སྐབས་སུ་ཕྱི་ལོགས་སུ་འགྲོ་སྐབས་རྐང་པ་གཉིས་ཀྱིས་སར་རེག་སྲོལ་ཡང་མེད་པར་ནམ་ཡིན་ཡང་ཁྱོགས་ཁྲིའི་སྟེང་དུ་བཏེགས་ནས་ཁུར་དགོས་པ་རེད། དེ་ཡིན་དུས་ཐོག་མར་སྲང་ལམ་དུ་གོམ་བགྲོད་ཀྱང་བྱེད་ཤེས་ཀྱིན་མི་འདུག སྲང་ལམ་དུ་འགྲོ་སྐབས་རྟ་རྒོད་ཅིག་གི་འགྲོ་སྟངས་ལྟ་བུ་ཞིག་རེད། དེ་བཞིན་དུ་མི་རྒྱུས་མེད་ཚོར་སྐད་ཆ་ཤོད་སྟངས་ཀྱང་མི་ཤེས་པས་ནམ་ཡིན་ཡང་ཁུ་སིམ་མེར་སྡོད་ཀྱིན་འདུག མོ་རང་ཕྱི་ལོགས་སུ་འགྲོ་བསམ་ཡང་འགྲོ་ལམ་མི་ཤེས་པའི་དཀའ་ངལ་བྱུང་སོང་ཟེར།

ད་དུང་དེས་ག་ལ་ཚད། སློབ་སྦྱོང་གི་ཆ་ནས་མོ་རང་དང་ན་མཉམ་ཚོ་ལས་ལོ་རིམ་བཞི་རྗེས་སུ་ལུས་འདུག་པས་དེའི་རྗེས་ཆོད་པར་དཀའ་ངལ་བྱུང་འདུག ཡིན་ནཡང་ང་མོ་དང་འཕྲད་སྐབས་སུ་མོ་རང་སློབ་ཆེན་སློབ་མ་རེད་འདུག ཀ་ལི་ཀ་ཏར་འཛུགས་སྐྲུན་རིག་པ་སྦྱངས་བར་འགྲོ་འདོད་འདུག གང་ལྟར་མོ་རང་གི་མི་ཚེ་ལ་ཀུ་མ་རི་བྱེད་པའི་གོ་སྐབས་ཤིག་བྱུང་བ་དེ་ལ་འགྱོད་པ་ནམ་ཡང་མེད་པར་སྐལ་པ་བཟང་པོ་ཞིག་དང་ཚོར་སྣང་བཟང་པོ་ཞིག་འདུག་ཟེར།

འདི་གའི་རྒྱུ་ཆ་རྣམས་ང་ཚོའི་ཆོག་མཆན་མེད་པར་བརྐུ་བཤུ་བརྒྱུད་འགོད་མ་བྱེད་རོགས།

རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་མཆོག་མཚོ་སྔོན་པོའི་རྒྱུད་དུ་ཕེབས་པ།

རྡོ་རྗེ་ཚེ་སྲུང་གིས་བསྡུ་བསྒྲིགས་བྱས།

རྡོ་གྲུབ་ཆེན་རིན་པོ་ཆེ་དབུས་སུ་ཕེབས་ཐེངས་རྗེས་མ་ལས་ཕྱིར་ཁམས་སུ་ཕེབས་རྗེས་སུ་ཡེ་ཤུའི་འདས་ལོ་༡༧༩༣ལ་སྡེ་དགེ་རྒྱལ་མོ་ཚེ་དབང་ལྷ་མོ་དང་རྒྱལ་སྲས་ཚེ་དབང་རིག་འཛིན་རྡོ་རྗེས་གདན་འདྲེན་ཞུས་པ་བཞིན་སྡེ་དགེ་རྒྱལ་ཁབ་ཀྱི་ཕོ་བྲང་དུ་ཕེབས།

ཀློང་ཆེན་སྙིང་ཐིག་གི་ཆོས་འཁོར་རྒྱ་ཆེན་པོ་བསྐོར། ཚུལ་དེ་རིག་འཛིན་འཇིགས་མེད་གླིང་པས་གསན་པས་ཐུགས་དགྱེས་ཚོར་ཆེན་པོ་གནང་།དེ་ཡང་རང་རྣམ་ལས་འདི་ལྟར་གསུངས་ཡོད། རྡོ་བླས་ཁམས་སུ་ཀློང་ཆེན་སྙིང་ཐིག་གཙོ་བོར་གྱུར་པའི་ཆོས་ཁྲིད་ཐེངས་གསུམ་ལ་གནང་འདུག ཐེངས་དང་པོ་ལ་ཆོས་ཞུ་བ་སྟོང་ཕྲག་གཉིས། ཐེངས་གཉིས་པ་ལ་སྟོང་ཕྲག་གསུམ། ཐེངས་གསུམ་པ་ལ་སྟོང་ཕྲག་ལྔ་འཛོམ་འདུག སྐབས་དེར་ཁྱིམ་པ་ཧ་ཅང་མང་པོས་རྔོན་མི་བྱེད་པའི་དམ་བཅའ་ཕུལ་འདུག་པས་སྲོག་ཆགས་དུད་འགྲོ་མང་པོར་མི་འཇིགས་པ་སྐྱབས་ཀྱི་སྦྱིན་པ་བསྩལ་བ་དེས་ང་ལ་དགའ་སྤྲོ་ཆེན་པོ་སྐྱེས་བྱུང་། ང་དབེན་གནས་འའདིར་བསྡད་ནས་གྲུབ་འབྲས་ཆུང་ངུ་ཞིག་བསྐྲུན་ཐུབ་པ་དང་བྱང་ཆུབ་ཀྱི་སྤྱོད་པ་སྤེལ་ནུས་པ་འདི་ནི་ལུང་བྱང་ལས་གསུང་པ་མངོན་དུ་གྱུར་པ་ཡིན་ཚུལ་གསུང་འདུག

ལོ་དེར་སྡེ་དགེ་རྒྱལ་པོ་ཚང་གིས་སྦྱིན་བདག་དང་རེ་སྐུལ་ཞུས་པ་བཞིན་རྫ་ཆུ་ཁའི་དགེ་རྩེ་སྟོད་དུ་འོག་མིན་རིག་འཛིན་འཕེལ་རྒྱས་གླིང་ཞེས་པའི་དགོན་པ་འདེབས་པའི་རྨང་བཏིང་། ཡིན་ན་ཡང་རྡོ་གྲུབ་ཆེན་རིན་པོ་ཆེར་སྔར་ནས་རྒྱ་ནག་རི་བོ་རྩེ་ལྔར་བསྙེན་སྒྲུབ་ལ་ཕེབས་པའི་དགོངས་བཞེད་ཟབ་མོ་ཞིག་ཡོད་སྟབས་སྡེ་དགེ་རྒྱལ་ཁང་གི་མཆོད་གནས་སུ་ཡུན་རིང་ཞིག་བཞུགས་པར་ཞལ་བཞེས་མ་གནང་བར་ཞལ་གྱེས། དེ་ཡང་ལོ་དེར་མདོ་སྨད་ཀྱི་བྲག་དཀར་སྤྲེལ་རྫོང་དུ་དགུན་གཅིག་རིང་སྐུ་མཚམས་ལ་བཞུགས། སྒོ་མེ་ཆོས་རྗེ་རིན་པོ་ཆེ་སོགས་ལ་ཀློང་ཆེན་སྙིང་ཐིག་གི་ཁྲིད་རྒྱུན་འབུལ་གནང་དང་ཚུར་ཡང་སྒོ་མེ་ཆོས་རྗེ་རིན་པོ་ཆེ་ལས་གསུང་ཆོས་གསན་བཞེས་གནང་།

ཁོང་གིས་མཚོ་སྔོན་པོའི་ཤར་ལྷོའི་རྒྱུད་ཀྱི་བོད་སོག་གི་ཚོ་སྡེ་མང་པོར་ཆོས་ཁྲིད་མང་དུ་གནང་། ཆུ་མེད་སར་ཆུ་བཏོན་པ་སོགས་གྲུབ་རྟགས་ཆེ་བའི་གྲགས་པ་ཡང་བྱུང་། མཚོ་སྔོན་པོའི་རྒྱུད་ཀྱི་སོག་པོ་ཚོའི་ཁྲོད་དུ་ཧར་ཧན་ཏཱ་ལའི་བླ་མ་ཞེས་གྲགས། ཁོང་ལ་དེ་ལྟར་སྐད་གྲགས་བྱུང་རྗེས་སུ་ཡུལ་ཕྱོགས་དེར་གསང་སྔགས་རྙིང་མའི་ཆོས་བྱེད་མི་ཆོག་པའི་ཁྲིམས་བཅས་ཡོད་ཀྱང་ས་ཁུལ་དེར་སྟོབས་ཤུགས་ཆེ་བའི་ཇུ་ནང་ཛ་སག་གིས་རང་གནས་སུ་གདན་དྲངས། ཁོང་ལ་བུ་ཕྲུག་མང་པོ་པོ་ཡོད་ཀྱང་ཚང་མར་འཆི་རྐྱེན་བྱུང་བས་རྐྱེན་ངན་དེ་བཟློག་ཐབས་སུ་རྡོ་གྲུབ་ཆེན་རིན་པོ་ཆེར་སྐྱབས་འཇུག་ཞུས། རྡོ་གྲུབ་ཆེན་གྱིས་བྱིན་བརླབས་སྐྱབས་འོག་ཏུ་བཅུག་པའི་ཉེར་ལེན་ལས་དཔོན་པོ་ལ་སླར་ཡང་བྱིས་པ་ཞིག་བཙས། བྱིས་པ་དེ་ཆུང་ངུའི་དུས་སུ་ནད་ཀྱིས་མནར་ཚབ་ཆེ་བས་མི་ཕལ་མོ་ཆེས་ཡུན་རིང་མི་འཚོ་བར་ཐག་བཅད་ཡོད། ཡིན་ན་ཡང་བྱིས་པ་དེ་རིམ་གྱིས་དྲག་སྐྱེད་བྱུང་ནས་འཚོ་ཐུབ་པ་བྱུང་བས་དེ་ཡང་རྡོ་གྲུབ་ཆེན་རིན་པོ་ཆེའི་བྱིན་གྱིས་བརླབས་པའི་ནུས་པ་ལ་ཡིད་ཆེས་བྱུང་། ཐོག་མར་བྱིས་པ་དེའི་མིང་ལ་ཡ་མ་ཐར་ཞེས་པ་ཡིན་ཡང་རྗེས་སུ་རིག་འཛིན་དབང་རྒྱལ་ཞེས་བཏགས། རྐྱེན་དེ་ལྟ་བུར་བརྟེན་ཡུལ་ཕྱོགས་དེར་ཡང་ཆོས་ལུགས་རིས་སུ་མ་ཆད་པ་དར་འཕེལ་ལ་གུ་ཡངས་ཀྱི་བག་ཆགས་བཞག

ཡུལ་དེའི་སོག་པོའི་དཔོན་རིགས་ཆིང་དབང་ངག་དབང་དར་རྒྱས་སམ་ཝཾ་རྒྱལ་པོ་དང་ཆོས་རྒྱལ་ངག་གི་དབང་པོར་(1759-1807)གྲགས་པ་དེས་གདན་དྲངས་ཞིང་ཆོས་འབྲེལ་བཞག ཆོས་རྒྱལ་མཆོག་དང་། བཙུན་མོ། དང་གཞན་མི་སྣ་གལ་ཆེན་བཞི་བཅུ་ནས་བརྒྱ་ཕྲག་བརྒལ་བར་ཀློང་ཆེན་སྙིང་ཐིག་དང་། མཁའ་འགྲོ་སྙིང་ཐིག ཡོན་ཏན་རིན་པོ་ཆེའི་མཛོད་སོགས་གསུང་ཆོས་མང་དུ་གནང་། རྡོ་གྲུབ་ཆེན་གྱི་དངོས་སློབ་སྐད་གྲགས་ཆེ་བ་དགོན་ལ་ཁ་བ་འཇིགས་མེད་ནམ་མཁའ་རྒྱལ་མཚན་གྱི་གདན་ས་ལ་སྔགས་པ་སྟོང་དང་དགུ་བརྒྱ་ལས་བརྒལ་བ་འདུས་ཞེས་གྲགས། སོག་པོ་ཨ་ལག་ཤའི་མཁས་པ་སྐད་གྲགས་ཅན་བསྟན་དར་ལྷ་རམས་པས་རྡོ་གྲུབ་ཆེན་རིན་པོ་ཆེའི་དྲུང་ནས་གསུང་ཆོས་ཞུས། ཕྱིས་སུ་ཁོང་གིས་ཡོན་ཏན་རིན་པོ་ཆེའི་མཛོད་ལ་འགྲེལ་བ་ཞིག་ཀྱང་མཛད།

སྐབས་དེར་ཁོང་ལ་ཟི་ལིང་དུ་བཅའ་སྡོད་མན་ཇུའི་ཨམ་བན་དང་འབྲེལ་བའི་དཀའ་ངལ་ཞིག་འཕྲད། རྡོ་གྲུབ་ཆེན་རིན་པོ་ཆེ་ཟི་ལིང་གི་ཨམ་བན་གྱི་ལས་ཁུངས་སུ་འབོད་འགུགས་བྱས། སྐད་སྒྱུར་བ་གཉིས་བརྒྱུད་ནས་ཉིན་གང་ལ་འདྲི་རྩད་བྱས། སྐབས་དེར་ཁོང་ལ་ཉེས་འཛུགས་སྣ་ཁ་ཁ་ཤས་ཤིག་བྱས། གཅིག་གི་ཁམས་ཕྱོགས་ཀྱི་ཇག་འཁྱམས་ཚོ་ཁག་གཅིག་ཡུལ་ཕྱོགས་དེར་འབྱོར་ཡོད་པ་དེ་ལ་རྡོ་གྲུབ་ཆེན་རིན་པོ་ཆེས་རོགས་སྐྱོར་བྱེད་བཞིན་ཡོད་ཚུལ་རེད། དེ་ནི་བདེན་པ་ཞིག་གཏན་ནས་མིན། ཁོང་ཚོ་རྡོ་གྲུབ་ཆེན་པོ་ཆེར་མཇལ་བཅར་ཞུས་ཡོད་སྲིད་པ་ཙམ་ལས་རྡོ་གྲུབ་ཆེན་རིན་པོ་ཆེ་དང་ཁམས་ཀྱི་མི་དེ་ཚོའི་བར་ལ་འབྲེལ་བ་གཞན་གང་ཡང་མེད། ཉེས་འཛུགས་གཞན་ཞིག་ནི་རྡོ་གྲུབ་ཆེན་རིན་པོ་ཆེ་མཚོ་སྔོན་པོའི་རྒྱུད་དུ་སླེབས་ནས་ཡུན་རིང་ཞིག་ཡིན་ཡང་ཟི་ལིང་ཨམ་བན་ལ་སྙན་སེང་དང་ཆོག་མཆན་མ་ཞུས་པ་དེ་རེད། དེ་ནི་བདེན་པ་རེད། ད་དུང་ཉེས་འཛུགས་གཞན་ཞིག་ནི་རྡོ་གྲུབ་ཆེན་རིན་པོ་ཆེའི་ཆོས་ཀྱི་མཛད་སྒོ་སོགས་ཀྱི་སྐབས་སུ་མཁན་ཞུ་མནབ་ཀྱིན་ཡོད་པ་རེད། དེ་ནི་ཁོང་ལ་ཁྲིམས་ཐོག་ནས་ངོས་ལེན་ཡོད་པའི་གྲྭ་ས་ནས་ཞྭ་མོ་དེ་མནབ་ཆོག་པའི་གནས་རིམ་གོ་ཐོབ་མེད་པ་དེ་ཁྲིམས་འགལ་ཡིན་ལུགས་ཤིག་རེད། དེ་ཡང་ཕྱོགས་གཅིག་ནས་བདེན་པ་རེད། རྡོ་གྲུབ་ཆེན་རིན་པོ་ཆེར་དེ་ལྟ་བུའི་གདན་ས་གྲྭ་སའི་གོ་མིང་ཐོབ་ཐང་ཐོབ་མྱོང་མེད་པ་རེད།

གང་ལྟར་ཡང་ཆིན་དབང་ངག་དབང་དར་རྒྱས་དང་ཇུ་ནང་ཛ་སག་སོགས་མཚོ་སྔོན་པོའི་རྒྱུད་ཀྱི་བོད་སོག་གི་དཔོན་རིགས་ཚང་མ་ཚོགས་སར་བཤད་སྦྱངས་བྱས་བྱས་པའི་ཐ་མར་རྡོ་གྲུབ་ཆེན་རིན་པོ་ཆེར་ཁྲིམས་ལ་སྦྱར་འོས་པའི་ནག་ཉེས་ཤིག་འགེལ་རྒྱུ་རྙེད་མི་འདུག ཐ་མ་ཁོང་གློད་གྲོལ་བཏང་བ་ཙམ་དུ་མ་ཟད་ཨམ་བན་རང་ཉིད་ཀྱི་ལས་རོགས་ཤིག་ནད་ཀྱིས་མནར་བཞིན་པ་དེར་སྐྱབས་འཇུག་ཀྱང་ཞུས་པས་ཚང་མར་ངོ་མཚར་སྐྱེས། གལ་སྲིད་སྐབས་དེར་རྡོ་གྲུབ་ཆེན་རིན་པོ་ཆེར་ཁྲིམས་ཐོག་གི་དཀའ་ངལ་ཞིག་འཕྲད་པ་ཡིན་ན་དེ་ནི་ཁོང་གཅིག་པོ་དང་འབྲེལ་བའི་དཀའ་རྙོག་ཅིག་མིན་པར་ཁོང་དང་འབྲེལ་བ་ཟབ་པའི་སོག་པོའི་དཔོན་རིགས་ཚོའི་གོ་གནས་དང་ཡང་འབྲེལ་བ་ཡོད་པ་ཞིག་ཡིན།

ཟླ་བ་ཁ་ཤས་ཀྱི་རྗེས་སུ་ཁོང་ལ་ཨམ་བན་གྱི་བཀའ་ཤོག་ཅིག་འབྱོར་ནས་སླར་ཡང་ཟི་ལིང་དུ་ཕེབས་དགོས་བྱུང་། སྐབས་དེར་ཨམ་བན་གྱིས་གུས་ཞབས་ཆེ་བའི་རྣམ་འགྱུར་དང་འབྲེལ་ནས་མན་ཇུ་གོང་མས་ཁྱོད་ཀྱི་སྐོར་ལ་བཀའ་ཤོག་ཅིག་འབྱོར་སོང་ཟེར། སྤྱིར་བཏང་མི་སུ་ཞིག་ཡིན་རུང་གོང་མའི་བཀའ་ཤོག་སྒྲོག་སྐབས་ཡར་ལངས་ཤིང་ཁ་ཤར་ཕྱོགས་སུ་འཁོར་ནས་གོང་མ་ཆེན་པོར་གུས་པའི་རྣམ་འགྱུར་གྱིས་ཉན་དགོས་པ་རེད། ཡིན་ན་ཡང་ཁྱོད་བླ་མ་ངོ་མཚར་ཅན་ཡིན་སྟབས་ཡར་ལངས་མི་དགོས། བཞུགས་སྟེགས་སྟེང་དུ་བཞུགས་བཞིན་དུ་ཞལ་ཤར་ཕྱོགས་སུ་འཁོར་ནས་བཀའ་ཤོག་གི་བརྗོད་དོན་ལ་གསན་ན་འགྲིགས་ཞེས་བརྗོད། མན་ཇུའི་གོང་མ་ཅ་ཆིང་(1796-1820)གི་བཀའ་ཤོག་གི་དོན་སྙིང་ངོ་མ་འདི་ཙམ་རེད། གལ་སྲིད་བླ་མས་ཡུལ་ཁམས་དེའི་མི་མང་ལ་ཕན་ཐོགས་པ་ཡིན་ན་ཞྭ་མོ་དམར་པོའི་ཆོས་ལུགས་༼རྙིང་མ་བ༽ཡིན་ཡང་སྐྱོན་མི་འདུག ཡིན་ན་ཡང་ཁོང་ངེས་པར་དུ་ས་ཁུལ་དེར་བཞུགས་དགོས། རི་བོ་རྩེ་ལྔར་ཡང་ཕེབས་མི་ཆོག བོད་དབུས་ཕྱོགས་སུ་ཡང་ཕེབས་མི་ཆོག ཁོང་གི་འཁྲུངས་ཡུལ་ཕྱོགས་སུ་ཡང་ཕེབས་མི་ཆོག གལ་སྲིད་གནད་དོན་ཆེན་པོ་བྱུང་ནས་ངེས་པར་དུ་ས་ཁུལ་འདི་དང་ཁ་འབྲལ་དགོས་བྱུང་ན་ཐོག་མར་མན་ཇུ་གོང་མ་དང་བཀའ་བགྲོ་གནང་བ་ཞུ་དགོས། མཚོ་སྔོན་པོའི་རྒྱུད་ཀྱི་དཔོན་རིགས་དང་མི་མང་ཚོས་ངེས་པར་དུ་ཡང་བླ་མ་ལ་གུས་བརྩི་ཞབས་ཏོག་ཡག་པོ་ཞུ་དགོས་སོགས་འཁོད་ཡོད་འདུག

ས་ཁུལ་དེའི་མི་མང་གི་སེམས་སུ་མན་ཇུ་གོང་མས་དེ་ལྟར་ཁོང་ལ་ཆེ་བསྟོད་ལྟ་བུའི་ངོས་འཛིན་བྱས་པ་དང་ས་ཁུལ་དེར་བཞུགས་ཆོག་པའི་བཀའ་ཤོག་འབྱོར་བ་དེས་སོག་པོ་མདའ་ཚན་བཅུ་གཉིས་ཀྱི་བསོད་ནམས་དང་གཟི་བརྗིད་ཅིག་ཏུ་བརྩིས། ཡིན་ན་ཡང་རྡོ་གྲུབ་ཆེན་རིན་པོ་ཆེ་རྒྱ་ནག་རི་བོ་རྩེ་ལྔར་ཕེབས་པའི་རེ་བ་གཏན་ཕམ་ཏུ་ཕྱིན། ད་དུང་ཁོང་ལ་བསྐྱར་དུ་དབུས་སུ་ཐེངས་གཅིག་ཕེབས་ནས་རིག་འཛིན་འཇིགས་མེད་གླིང་པ་མཇའ་འདོད་ཀྱི་འདུན་པ་ཡོད་ཀྱང་དེ་ཡང་མ་གྲུབ་པས་འཇིགས་མེད་ཆོས་གྲགས་ཁོང་གི་སྐུ་ཚབ་ཏུ་དབུས་སུ་བཏང་། དེ་ཡང་རང་ལ་དབང་བའི་དངོས་པོ་ཐམས་ཅད་སྤོང་དག་བྱས་ནས་འབུལ་བ་དངོས་ཟོང་རྒྱ་ཆེན་པོ་རིག་འཛིན་འཇིགས་མེད་གླིང་པ་ལ་བསྐུར། དེ་དང་ལྷན་དུ་ཆིན་དབང་ངག་དབང་དར་རྒྱས་ཀྱིས་ཀྱང་རིག་འཛིན་འཇིགས་མེད་གླིང་པ་ལ་འབུལ་བ་མང་པོ་བསྐུར།

སྐབས་དེར་སོག་པོའི་དཔོན་རིགས་ཚོས་ཁོང་ལ་དགོན་པ་ཞིག་བཞེངས་ནས་ཡུལ་དེར་གཏན་བཞུགས་གནང་ན་མཐུན་རྐྱེན་སྦྱར་བའི་ཁས་ལེན་བྱས་ཀྱང་ཁོང་གིས་ཞལ་བཞེས་མ་གནང་། ཨ་རིག་དགེ་བཤེས་ཆེན་མོ་བྱམས་པ་དགེ་ལེགས་རྒྱལ་མཚན་(1726-1803)གྱིས་ཁོང་ལ་ཆེ་བསྟོད་དང་འབུལ་བ་ཕུལ་ནས་ཆོས་གསན་ཞིང་ཁོང་གིས་ཀྱང་ཨ་རིག་དགེ་བཤེས་ལས་གསུང་ཆོས་ཞུས།

ཐ་མ་དེར་རྡོ་གྲུབ་ཆེན་རིན་པོ་ཆེའི་འཁྲུངས་ཡུལ་དུ་ཁོང་ལ་དྲིན་ཆེ་བའི་གཉེན་ཚན་རྒན་པོ་ཞིག་ནད་ཀྱིས་མནར། དེར་རྒན་པོ་དེས་རྡོ་གྲུབ་ཆེན་རིན་པོ་ཆེ་ཁོའི་སར་མ་ཕེབས་ན་སྨན་བཅོས་སྣ་གཅིག་ཀྱང་མི་བརྟེན། ཁ་འདོན་ཡང་མི་བྱེད། དགོན་པར་སྐྱབས་ཞུར་ཡང་མི་བཅར་ཞེས་ཨུ་ཚུགས་བྱས་པ་སོགས་ཀྱིས་ཁོང་རང་གི་འཁྲུངས་ཡུལ་ལ་ཕེབས་དགོས་པའི་སྐུལ་མ་མང་པོ་བྱུང་། བླ་མ་པདྨ་དམ་ཆོས་ཁོང་གི་སྐུ་ཚབ་ལྟ་བུར་ཡུལ་དེར་བཞག་ནས་ཡེ་ཤུའི་འདས་ལོ་༡༧༩༩ལོར་ཕྱིར་ཕ་ཡུལ་དུ་ཕེབས།

 འདི་གའི་རྒྱུ་ཆ་རྣམས་ང་ཚོའི་ཆོག་མཆན་མེད་པར་བརྐུ་བཤུ་བརྒྱུད་འགོད་མ་བྱེད་རོགས།

མའེ་སོར་དུ་གླང་ཆེན་གྱི་འཇིག་པ་བྱུང་སོང་།

ཁར་སང་ཚེས་དགུ་སྟེ་གཟའ་ལྷག་པའི་ཉིན་མོར་རྒྱ་གར་ལྷོ་ཕྱོགས་ཀྱི་གྲོང་ཁྱེར་མའེ་སོར་དུ་གླང་ཆེན་གྱིས་མི་བསད་པའི་རྐྱེན་ངན་ཞིག་བྱུང་སོང་།

དེ་ཡང་ནགས་ན་གནས་པའི་གླང་ཆེན་ཕོ་གཉིས་གྲོང་ཁྱེར་ནང་གི་མི་ཚོགས་ཀྱི་འདུ་འཛི་ཆེ་ས་སྨྱུག་མའི་ཚོང་བརྡལ་ཟེར་བ་དེར་གློ་བུར་དུ་བརྒྱུགས་ནས་གཏོར་བཤིག་དང་རྒོལ་རྡུང་སྣ་ཚོགས་བྱས། གླང་ཆེན་གཅིག་གིས་ཐ་ན་སྲང་ལམ་ན་རྒྱུ་བའི་བ་གླང་ཞིག་ཀྱང་གཙེས། སྐབས་དེར་སྟབས་མ་ལེགས་པ་ཞིག་ལ་ལོ་ལྔ་བཅུ་ང་ལྔ་ལ་སོན་པའི་སྐྱེས་པ་ཞིག་གླང་ཆེན་གྱིས་སྣ་ཞགས་ཀྱིས་བརྡུངས་ཤིང་བརྡེགས་པ་དང་རྐང་པས་བརྫི་བ་སོགས་ཉམ་ང་ཞིང་འཇིགས་སུ་རུང་བའི་དྲག་སྤྱོད་ཀྱིས་བསད།

ཐ་མ་སེམས་ཅན་གླིང་ཁའི་ལས་བྱེད་པ་དང་། ནགས་ཚལ་སྲུང་སྐྱོབ་ལས་བྱེད་པ་ཚོས་སེམས་ཅན་དེ་གཉིས་གྲོང་ཁྱེར་ནས་ཕྱིར་འབུད་ཀྱིས་ནགས་གསེབ་དུ་གཏོང་ཐུབ་པ་རེད། རྐྱེན་ངན་དེ་བྱུང་རྗེས་སུ་ས་གནས་དེའི་སློབ་ཆུང་དང་སློབ་ཆེན་ཚང་མ་ཉིན་གཅིག་གི་རིང་སྒོ་བརྒྱབས། རྒྱ་གར་ཡུལ་ཡོངས་སུ་རི་ན་གནས་པའི་གླང་ཆེན་ཁྲི་གཉིས་ལྷག་ཙམ་ཡོད་ཅིང་སྲིད་གཞུང་གིས་གླང་ཆེན་ཡང་སྟག་དང་མཚུངས་པར་སྲུང་སྐྱོབ་བྱེད་པའི་ཁྲིམས་བཏོད་ཡོད་པ་རེད།

སྙིང་ཐིག་གླེང་སྟེགས་དོ་དམ་པས།

འཕགས་ཡུལ་རིག་འཛིན་མཆོག་བརྒྱད་ཀྱི་གསོལ་འདེབས་བྱིན་རླབས་ཆར་རྒྱུན་ཞེས་བྱ་བ་བཞུགས་སོ༎

རྣམ་ཀུན་མཆོག་ལྡན་ཆོས་སྐུའི་མཁའ་དབྱིངས་ལ༎ཡན་ལག་བདུན་ལྡན་ལོངས་སྐུའི་ཉ་རྒྱས་དལ༎གདུལ་བྱའི་ཚོགས་ལ་བསམ་ཡས་སྤྲུལ་སྐུའི་ཚུལ༎སྒྱུ་འཕྲུལ་དྲྭ་བར་བསྒྱུར་ལ་གསོལ་བ་འདེབས༎

ཤར་ཕྱོགས་བསིལ་བ་ཚལ་གྱི་དུར་ཁྲོད་དུ༎ ཡང་དག་ཐུགས་ཀྱི་གསང་མཛོད་སྒོ་ཕྱེས་ནས༎གྲུབ་བརྙེས་ཡིད་བཞིན་གཏེར་ལ་དབང་བསྒྱུར་བ༎སློབ་དཔོན་ཧཱུྃ་ཀ་ར་ལ་གསོལ་བ་འདེབས༎ལྷོ་ཕྱོགས་སྐུ་ལ་རྫོགས་པའི་དུར་ཁྲོད་དུ༎འཇམ་དཔལ་སྐུ་ཡི་ས་བོན་ལེགས་བཏབ་ནས༎རྡོ་རྗེ་བཞི་ཡི་འབྲས་བུ་ཡོངས་སྨིན་པ༎འཇམ་དཔལ་བཤེས་གཉེན་ཞབས་ལ་གསོལ་བ་འདེབས༎ནུབ་ཕྱོགས་པདྨ་བརྩེགས་པའི་དུར་ཁྲོད་དུ༎པདྨ་གསུང་གི་ཆུ་གཏེར་རབ་བརྒལ་ནས༎ཇི་ལྟ་ཇི་སྙེད་མཁྱེན་པའི་ནོར་ཐོབ་པ༎ཀླུ་སྒྲུབ་སྙིངཔོའི་ཞབས་ལ་གསོལ་བ་འདེབས༎བྱང་ཕྱོགས་ལང་ཀ་བརྩེགས་པའི་དུར་ཁྲོད་དུ༎ཕུར་པ་འཕྲིན་ལས་རྡོ་རྗེའི་མཚོན་བརྡུང་པས༎སྲིད་གསུམ་ཡོངས་སུ་བསྒྲལ་བའི་མཐུ་ཐོབ་པ༎པྲ་ཆེན་ཧསྟིའི་ཞབས་ལ་གསོལ་བ་འདེབས༎ཤར་ལྷོ་ལྷུན་གྲུབ་བརྩེགས་པའི་དུར་ཁྲོད་དུ༎རྦོད་གཏོང་མ་མོའི་དགའ་མར་རྟག་རོལ་བས༎ཟག་མེད་བདེ་ཆེན་ལང་ཚོ་རབ་རྒྱས་པ༎དྷ་ན་སཾ་ཀྲིའི་ཞབས་ལ་གསོལ་བ་འདེབས༎ལྷོ་ནུབ་གསང་ཆེན་རོལ་པའི་དུར་ཁྲོད་དུ༎ཡོན་ཏན་བདུད་རྩིའི་བཅུད་ལ་ལོངས་སྤྱོད་པས༎འཕོ་མེད་འཇའ་ལུས་མཆོག་གི་སྐུར་བཞེངས་པ༎བཱི་མ་མི་ཏྲའི་ཞབས་ལ་གསོལ་བ་འདེབས༎ནུབ་བྱང་ཧེ་ཆེན་བརྡལ་བའི་དུར་ཁྲོད་དུ༎འཇིག་རྟེན་མཆོད་བསྟོད་དཔུང་ཚོགས་རབ་བརྔན་པས༎མ་རུང་བདུད་སྡེའི་གཡུལ་ངོ་ཕམ་བྱེད་པ༎རོམ་བུ་གུ་ཧྱའི་ཞབས་ལ་གསོལ་བ་འདེབས༎བྱང་ཤར་འཇིག་རྟེན་བརྩེགས་པའི་དུར་ཁྲོད་དུ༎དྲག་སྔགས་དམོད་པའི་མེ་དཔུང་རབ་སྦར་བས༎ཕས་རྒོལ་རྩི་ཤིང་བསྲེགས་པའི་མཐུ་ཐོབ་པ༎ཤིནྟ་གྷརྦྷའི་ཞབས་ལ་གསོལ་བ་འདེབས༎སྐུ་གསུམ་རྒྱལ་བའི་ཞིང་ཁམས་ཐམས་ཅད་དུ༎སྒྲུབ་སྡེ་བརྒྱད་ལ་མངོན་པར་བྱང་ཆུབ་པས༎རིག་འཛིན་རྣམ་བཞིའི་གོ་འཕང་མཆོག་བརྙེས་པ༎ཨོ་རྒྱན་ཐོད་ཕྲེང་རྩལ་ལ་གསོལ་བ་འདེབས༎དེ་ལྟར་གསོལ་བ་བཏབ་པས་རྒྱལ་རྣམས་ཀྱི༎མཁྱེན་བརྩེ་ནུས་པའི་བྱིན་རླབས་དཔལ་ཡོན་ཀུན༎བདག་གིས་ལེགས་ཐོབ་རྡོ་རྗེའི་སྐུར་སྨིན་ཏེ༎མ་ལུས་འགྲོ་བའི་དཔལ་དུ་འགྱུར་བར་ཤོག །དེ་ལྟར་འཕགས་ཡུལ་རིག་འཛིན་མཆོག་བརྒྱད་ཀྱི་གསོལ་འདེབས་བྱིན་རླབས་ཆར་རྒྱུན་ཞེས་བྱ་བ་འདི་ཉིད་རི་བོ་དགའ་ལྡན་པའི་རབ་འབྱམས་པ་དོན་གྲུབ་རྒྱ་མཚོས་བསྐུལ་བའི་ངོར་གསང་སྔགས་ཀྱི་དཀྱིལ་འཁོར་དུ་དབང་བསྐུར་ལེགས་པར་ཐོབ་ནས་ཐེ་ཚོམ་གྱི་གེགས་སུ་མ་ཞུགས་པའི་ཕྱིར་རྫོགས་པ་ཆེན་པོའི་རྣལ་འབྱོར་པ་འཇིགས་མེད་ཕྲིན་ལས་འོད་ཟེར་ཞེས་བྱས་བས་ཐོལ་བྱུང་དུ་ཤར་བ་ཡིད་ཆེས་ཐོབ་ནས་བྱང་ཕྱོགས་མཚོ་སྔོན་མོ་རུ་སྤེལ་བའི་དགེ་བས་འབྲེལ་ཐོབ་ཀྱི་རྒྱུད་ལ་བྱིན་རླབས་འཇུག་པའི་རྒྱུར་ཅིག །དགེའོ། དགེའོ། དགེའོ། སརྦ་མངྒ་ལཾ།

སྙིང་ཐིག་གླེང་སྟེགས་དྲ་བའི་དོ་དམ་པས་གླིག་ཡིག་ཏུ་འགོད་འཇུག་བྱས།