ཤྲི་ལང་ཁས་ལོ་གཉིས་ཀྱི་གོང་ལ་ཏ་མིལ་སྟག་གི་ཚོགས་ཁག་ཞེས་པའི་རང་བཙན་འཐབ་རྩོད་དྲག་རྒོལ་བའི་ཤོག་ཁག་ཕམ་ཉེས་སུ་བཏང་བ་དེར་རྒྱལ་སྤྱིའི་སྟེང་གི་མིའི་ཐོབ་ཐང་ཚོགས་པ་ཚོས་སྐབས་དེའི་ཤྲི་ལང་ཁའི་གཞུང་འཛིན་མི་སྣ་ཚོས་དམག་འཁྲུགས་ཀྱི་ཉེས་པ་བསགས་པའི་ཉེས་འཛུགས་དང་།
གནད་དོན་དེ་ངེས་པར་དུ་ཁྲིམས་ཐོག་ནས་ཐག་གཅོད་བྱ་དགོས་པའི་གནོན་ཤུགས་སྤྲོད་བཞིན་ཡོད་འདུག རེས་གཟའ་མིག་དམར་ཉིན་ཤྲི་ལང་ཁས་འཇིགས་སྐུལ་རིང་ལུགས་པ་ཕམ་པར་བྱེད་པ་ཞེས་པའི་བརྗོད་གཞིའི་ཐོག་ལ་རྒྱལ་སྤྱི་རང་བཞིན་ཅན་གྱི་ཚོགས་འདུ་ཞིག་བསྡུས། ཤྲི་ལང་ཁའི་གཞུང་དམག་ལ་གོ་མཚོན་ཚོང་སྤྲོད་བྱེད་མཁན་གཙོ་བོ་རྒྱ་ནག་ཡིན། ཐེངས་འདིའི་ཚོགས་འདུའི་སྐུ་མགྲོན་དང་གོ་སྒྲིག་མཐུན་འགྱུར་བྱེད་མཁན་ཡང་རྒྱ་ནག་ཡིན་འདུག ཚོགས་འདུ་དེའི་དམིགས་ཡུལ་ནི་ཤྲི་ལང་ཁའི་གཞུང་ཕྱོགས་ནས་ཏ་མིལ་སྟག་ཚོགས་ཕམ་པར་བྱས་པ་དེ་ནི་འཇིགས་སྐུལ་དྲག་སྤྱོད་པ་ཕམ་པར་བྱས་པའི་མིག་དཔེ་ཡག་ཤོས་ཡིན་པས་ཚང་མས་ཤེས་དགོས་པ་ཞིག་ཡིན་ཚུལ་བརྗོད། ཡིན་ན་ཡང་ཉུའུ་ཡོག་ཏུ་ཡོད་པའི་འགྲོ་བ་མིའི་ཐོབ་ཐང་ཚོགས་པས་ཤྲི་ལང་ཁའི་གཞུང་དམག་གིས་ཏ་མིལ་སྟག་ཚོགས་ལ་དཔུང་འཇུག་བྱེད་སྐབས་སུ་ཞི་བའི་མི་སེར་གྱི་སྟེང་དུ་འབར་རྫས་འཕངས་པ་དང་། སྨན་ཁང་གཏོར་བ། མགོ་འདོགས་སུ་ཡོང་བཞིན་པའི་མི་བསད་པ་སོགས་བྱས་ཡོད་སྟབས་ཐེངས་འདིའི་ཚོགས་འདུ་ཡུལ་གྲུ་ཁག་གི་སྐུ་ཚབ་སུ་ཡང་མི་ཞུགས་པའི་འབོད་སྐུལ་རེ་ཞུ་བཏོན། མཉམ་འབྲེལ་རྒྱལ་ཚོགས་ཀྱི་མིའི་ཐོབ་ཐང་ཚོགས་པའི་ཞིབ་འཇུག་པས་ཤྲི་ལང་ཁའི་གཞུང་དམག་གིས་ལོ་གཉིས་གོང་དུ་ཏ་མིལ་སྟག་ཚོགས་ལ་དཔུང་འཇུག་བྱེད་སྐབས་ཞི་བའི་མི་སེར་མང་པོའི་སྟེང་དུ་འབར་རྫས་འཕངས་བ་དང་། ངོ་རྒོལ་བ་ཚོ་མགོ་འདོགས་སུ་ཡོང་བཞིན་པའི་སྐབས་སུ་སྡེབས་གསོད་བྱེད་བཞིན་པའི་གློག་བརྙན་སོགས་དཔང་རྟགས་གསལ་པོ་ཡོད་ཚུལ་བརྗོད། དེར་བརྟེན་སྐབས་འདིའི་ཚོགས་འདུར་ཨ་མེ་རི་ཁ་དང་། བྷི་རེ་ཁྲིན། ཨ་སི་ཁྲི་རལ་ལི་ཡ། ཧྥ་རན་སི། ཉི་ཧོང་སོགས་ཚོགས་འདུ་དེར་མ་ཞུགས་པ་རེད། རྒྱ་ནག་དང་། རྒྱ་གར། ར་ཤི་ཡ། ད་དུང་ལྷོ་ཤར་ཨེ་ཤེ་ཡའི་གླིང་གི་ཡུལ་ཕལ་མོ་ཆེས་གཙོས་པའི་ཡུལ་ཁག་༤༠ཙམ་གྱི་སྐུ་ཚབ་ཞུགས་ཡོད་འདུག འདི་གའི་ཡིག་ཆ་རྣམས་བརྐུ་བཤུ་བརྒྱུད་འགོད་མ་བྱེད་རོགས།
No comments:
Post a Comment
ཁྱེད་ཀྱི་དགོངས་ཚུལ་གླེང་བར་རེ་སྒུག་ཡོད།