རྡོ་གྲུབ་ཆེན་སྐུ་ཕྲེང་གཉིས་པ་འཇིགས་མེད་ཕུན་ཚོགས་འབྱུང་གནས (1824–1863)་ནི་རྡོ་ཁོགས་སུ་འཁྲུངས། སྐུ་ན་གཞོན་པའི་དུས་སུ་མདོ་མཁྱེན་བརྩེ་ཡེ་ཤེས་རྡོ་རྗེས་གྲུབ་ཆེན་རིན་པོ་ཆེའི་ཡང་སྲིད་དུ་ངོས་འཛིན་གནང་།
༡༩༣༤ལོར་འཇིགས་མེད་རྒྱལ་བའི་མྱུ་གུའི་དྲུང་ནས་རིག་འཛིན་འདུས་པ་དང་རྫོགས་ཆེན་གྱི་ངོ་སྤྲོད་ཐོབ། བཤད་སྲོལ་ལ་ཁོང་གི་སྐུ་དུས་སུ་ཉག་རྐེད་མགོན་པོ་རྣམ་རྒྱལ་གྱིས་གསེར་རྟའི་ཕྱོགས་སུ་དམག་དྲངས་པའི་འཆར་གཞི་བཏིངས། རྡོ་གྲུབ་ཆེན་རིན་པོ་ཆེས་ཉག་རྐེད་མགོན་པོ་རྣམ་རྒྱལ་ལ་གསེར་རྟར་དམག་དྲངས་མི་རུང་བའི་བཀའ་འཕྲིན་གནང་། དེར་མགོན་པོ་རྣམ་རྒྱལ་གྱིས་རྡོ་གྲུབ་རིན་པོ་ཆེའི་དགོན་པ་ཡར་ལུང་པདྨ་བཀོད་ལ་གནོད་འཚེ་མི་བྱེད་པའི་ཁས་ལེན་བྱས། ཡིན་ན་ཡང་གྲུབ་ཆེན་རིན་པོ་ཆེས་གལ་སྲིད་གསེར་རྟའི་ཡུལ་སྡེ་ལ་གནོད་འཚེ་བྱས་ན་ཁོང་རང་ཉིད་ལ་གནོད་འཚེ་བྱས་པ་དང་ཁྱད་པར་མེད་པས་དམག་དྲངས་མི་རུང་ཚུལ་ནན་གྱིས་གསུངས། གྲུབ་ཆེན་རིན་པོ་ཆེས་བཀའ་གསུང་དེ་མགོན་པོ་རྣམ་རྒྱལ་གྱི་སེམས་ལ་མ་བབ་ནས་ཐོག་མར་གསེར་ཡར་ལུང་པདྨ་བཀོད་དགོན་པའི་སྟེང་ལ་དཔུང་འཇུག་བྱེད་དགོས་ཞེས་བཤད་ནས་ཉག་རོང་དམག་གིས་གྲུབ་ཆེན་ཡར་ལུང་དགོན་པ་གཏོར་བཤིག་ཚབ་ཆེན་བཏང་།
དགོན་པའི་ཉམས་ཆག་དེ་ལ་བརྟེན་ནས་རྡོ་གྲུབ་ཆེན་རིན་པོ་ཆེ་རྡོ་ཁོག་ཏུ་ཕེབས་ནས་རྡོ་སྟོད་དུ་གདན་ས་བཏབ་པ་དེང་སང་གི་རྡོ་གྲུབ་ཆེན་དགོན་པའམ་རྩང་ཆེན་དཔལ་འབར་གླིང་འདི་བྱུང་བ་ཡིན། རྡོ་གྲུབ་སྐུ་ཕྲེང་གཉིས་པ་འདི་དགུངས་ལོ་དེ་ཙམ་མང་པོ་མ་བཞུགས་ཤིང་དུས་ཚོད་ཕལ་མོ་ཆེ་མདོ་མཁྱེན་བརྩེ་ཡེ་ཤེས་རྡོ་རྗེ་དང་ལྷན་དུ་བསྐྱལ། ཁོང་གི་གདན་ས་རྡོ་སྟོད་དུ་ཆགས་རྗེས་སུ་རྒ་བཟའ་དམ་ཚིག་ཁབ་ཏུ་བཞེས་ཤིང་ཕལ་བའི་བློ་ངོར་མི་ཤོང་བའི་མཛད་པ་མང་དུ་བསྟན། ཚུལ་དེས་ཡུལ་དེའི་སྡེ་དཔོན་ཆོས་འཁོར་སྐལ་བཟང་དགེ་ལེགས་དང་འཁོན་འགྲས་བྱུང་། བཤད་རྒྱུན་ལ་སྐལ་བཟང་དགེ་ལེགས་རང་གི་ཚ་མོ་དེ་རྡོ་གྲུབ་ཆེན་རིན་པོ་ཆེས་ཁབ་ཏུ་བཞེས་པའི་རེ་འདུན་ཡོད་པ་རེད་ཟེར། རྐྱེན་དེར་བརྟེན་ནས་རྡོ་གྲུབ་ཆེན་རིན་པོ་ཆེ་རྡོ་ཁོག་ཏུ་བཞུགས་མི་བདེ་བར་གྱུར་ནས་ཁོང་གི་རྩ་བའི་བླ་མ་མདོ་མཁྱེན་བརྩེ་ཡེ་ཤེས་རྡོ་རྗེའི་བཞུགས་ཡུལ་དར་རྩེ་མདོར་ཕེབས།
དེར་འབྲུམ་པའི་འགོས་ནད་ཀྱི་བསྙུངས། སྙུང་གཞིས་གོས་ནས་ཡུན་རིང་མ་སོང་བའི་ཉིན་ཞིག་ལ་རྣལ་འབྱོར་བའི་ཤི་སྟངས་ཟེར་བ་དེ་སྲང་ལམ་གྱི་ཁྱི་ཤི་སྟངས་དང་མཚུངས་པ་ཞིག་དགོས་གསུངས་ནས་དར་མདོའི་སྲང་ལམ་དུ་ཉལ་ནས་གྲོངས་པ་རེད་ཟེར། མདོ་མཁྱེན་བརྩེས་དེ་གཟིགས་པས་རང་གི་སྲས་རིག་པའི་རལ་གྲི་ལ་སྐུ་ཕུང་གི་གཞོགས་གཅིག་ནས་ཡར་འཐེན་བཅུག མདོ་མཁྱེན་བརྩེ་རང་གིས་ཁུ་ཚུར་དང་རྡོག་ཐོས་རྒྱག་བཞིན་ཡར་ཙོག་པུར་བསླངས་ནས་དཀྱིལ་དཀྲོང་དང་མཉམ་བཞག་གི་བཞུགས་སྟངས་སུ་བཞག དེར་ཞག་བདུན་གྱི་བར་དུ་སྐུ་ཕུང་གི་བཞུགས་སྟངས་དེ་རང་མཛད་ཅིང་སྐུའི་གཟི་མདངས་མ་ཉམས་པར་ཐུགས་དམ་གྱི་ངང་ལ་བཞུགས། ཚུལ་དེས་སྲས་བདེ་ཆེན་རིག་པའི་རལ་གྲིའི་ཐུགས་ཡིད་འཕྲོག་ནས་རང་ཉིད་ཀྱི་རྩ་བའི་བླ་མའི་གྲས་སུ་བགྲང་པ་རེད་ཟེར་སྲོལ་འདུག
འདི་ནི་ངག་རྒྱུན་ལས་གང་ཐོས་མྱོང་བ་དག་ཡིག་ཐོག་ཏུ་ཕབ་པ་ཙམ་ཡིན་པས་ཐེངས་འདིར་དཔྱད་གཞི་ཙམ་དུ་བཀོད་པ་ཡིན། སྙིང་ཐིག་གླེང་སྟེགས་རྩོམ་སྒྲིག་པས།
འདི་གའི་ཡིག་ཆ་རྣམས་བརྐུ་བཤུ་བརྒྱུད་འགོད་མ་བྱེད་རོགས།
No comments:
Post a Comment
ཁྱེད་ཀྱི་དགོངས་ཚུལ་གླེང་བར་རེ་སྒུག་ཡོད།