བཙུན་པ་རིགས་ལམ་ལ་བྱང་བ་ཞིག་གནས་སྐོར་དུ་ཕེབས་ལམ་དུ་ས་རུབ་པས་ཁྱིམ་ཚང་ཞིག་གི་སྒོར་ཕེབས་ནས་གནས་ཚང་གཡར་རོགས་གསུངས། ཁྱིམ་ཚང་དེར་མ་རྒན་ཞིག་དང་མོའི་བུ་མོ་མ་གཏོགས་མེད། མ་རྒན་དེས་བཙུན་པ་དེར་ཁྱོད་ཚོ་གྲྭ་བ་རྟོག་གེ་བ་ཚོས་རྩོད་གླེང་བྱེད་ནས་སྡོད་དུ་མི་འཇུག་པས་གནས་ཚང་གཡར་མི་ཐུབ་ཅེས་བརྗོད།
བཙུན་པ་དེས་རྩོད་པ་མི་བྱེད་པའི་ཁས་ལེན་བྱས་རྗེས་སུ་མ་རྒན་དེས་གནས་ཚང་གཡར། ས་རུབ་ནས་ནུབ་ཟས་ཟ་སྐབས་མ་རྒན་གྱིས་གོས་ཧྲུལ་ནང་ནས་ཤིག་ཅིག་བཟུང་། ཤིག་འདི་མི་ཤི་ས་ཞིག་ལ་ཞོག་ཅིག་ཟེར་ནས་བུ་མོ་དེར་གཏད། བུ་མོས་ཤིག་དེ་བཟུང་ནས་ཁང་པའི་ཕྱིར་སོང་། བཙུན་པ་དེས། "མི་ཤི་ས་ཞིག་ལ་འཕེན་ས་ཡོད་ན་ང་ཡང་དེར་འཕེན་རོགས།” ཞེས་བརྗོད། དེར་མ་རྒན་གྱིས་ངས་སྔོན་ནས་གྲྭ་བ་ཁྱོད་ཚོས་རྩོད་པ་བརྒྱབ་ནས་སྡོད་དུ་མི་འཇུག་པས་གནས་ཚང་མི་གཡར་ཞེས་བརྗོད་དུས་ཁྱོད་ཀྱིས་རྩོད་པ་མི་བྱེད་པའི་ཁས་ལེན་བྱས་སོང་། ད་ཁྱོད་རང་གིས་ཁས་བླངས་པ་དེའི་དམ་བཅའ་དང་འགལ་སོང་ཞེས་བརྗོད་དེ་བཙུན་པ་དེ་སྒོར་ཕུད་དོ། ༼བོད་མི་ཚོར་ནང་ཆོས་ལས་བཤད་པའི་བྱམས་སྙིང་རྗེའི་བག་ཆགས་གཏིང་ཟབ་ཡོད་སྟབས་ལུས་ཀྱི་ཤིག་ཡིན་ཡང་དགུན་དུས་སུ་བལ་འཇམ་པོའི་ནང་དུ་དཀྲིས། ཕྱེ་མར་ཅུང་ཟད་ཙམ་བླུགས། སངས་རྒྱས་ཀྱི་མཚན་སྔགས་སོགས་བགྲང་། ཡིད་འགྱོད་བཞིན་དུ་ཤིང་ཕུང་གི་རྩ་བ་ལྟ་བུའི་ས་མིག་དྲོད་ཁོལ་ལྡན་པ་ཞིག་ལ་འཕེན་པ་ལས་དེ་མ་ཐག་རང་གིས་གསོད་པའམ། མེ་དང་ཆུར་འཕེན་པ། གང་བྱུང་དུ་གཡུག་པ་སོགས་མི་བྱེད།༽
No comments:
Post a Comment
ཁྱེད་ཀྱི་དགོངས་ཚུལ་གླེང་བར་རེ་སྒུག་ཡོད།