ན་མ་ཤྲི ་བཛྲ་དྷརྨ་པ་ལ་ཡེ།
ཚངས་པ་མགྲིན་སྔོན་ཁྱབ་འཇུག་དང་ནི་དབང་པོ་ཉེ་དབང་བཙུན་མོར་བཅས༎
ལྷ་ཆེན་ཀུན་གྱིས་མངོན་པར་བསྟོད་པ་དཔལ་ལྡན་རྡོ་རྗེ་ནག་པོ་ཆེ༎
ལྷ་མིན་ཚོགས་དང་ལྷ་མིན་ཡིད་ཅན་བསྟན་དགྲ་མ་ལུས་བརླགས་མཛད་པ༎
ཧེ་རུ་ཀ་ཡི་སྤྲུལ་པ་མཆོག་གྱུར་ཀྲོ་ཏི་ཡུམ་གྱི་བདག་པོར་འདུད༎
ཁྲོས་པའི་ཞལ་གྱི་སྤྲིན་ནག་འཁྲིགས་ལས་སྡང་མིག་གློག་ཞགས་རྣམ་གཡོ་ཞིང་༎
ཚེམས་ཀྱི་མྱུ་གུ་གངས་རིའི་མདངས་འཛིན་སྐྱིན་ཐང་ཟོལ་གྱིས་དགྲ་ལ་འབེབས༎
ལྕགས་ཀྱི་སྡེར་མོ་གནམ་ལྕགས་འབར་བས་ཉམས་པའི་ཙིཏྟ་དྲུང་འབྱིན་པའི༎
སྲིད་རྒྱལ་མ་ཞེས་སྔགས་སྲུང་གཙོ་མོ་ནམ་མཁའི་རལ་གཅིག་འཛིན་ལ་བསྟོད༎
སྡིག་ཅན་དགྲ་བོའི་སྙིང་ཁྲག་རྫིངས་བུར་མི་སྡུག་གཟུགས་ཀྱི་ཚང་ཚིང་འཁྲིགས༎
སྲིད་གསུམ་སྲོག་དབུགས་ཅིག་ཆར་རྔུབ་པའི་ལྟོ་ཞལ་འཇིགས་རུང་མཁའ་ལ་གདངས༎
ལེགས་ཉེས་འབྱེད་པའི་སྤྱན་སྟོང་བགྲད་ལས་དམ་ཉམས་སྙིང་ལ་དུག་ཆར་འབེབས༎
གསང་བདག་དཔའ་བོའི་བཀའ་སྡོད་མཐུ་ཆེན་འཇིགས་མཛད་རཱ་ཧུ་ལ་ལ་འདུད༎
ལས་བྱེད་མོན་པའི་རླུང་ནག་དང་འགྲོགས་སྦུད་པའི་གཞུ་དང་རྡོ་རྗེའི་མདའ༎
ལྷན་ཅིག་རྦད་པས་དགྲ་སྙིང་གཏོར་ཞིང་དགྲ་བོའི་ཀླད་པ་འགེམས་མཛད་པ༎
སྒྲོལ་གིང་ལས་ཀྱི་བཤན་པ་མཆོག་དང་དམ་ཅན་མ་མོ་ངན་ནེ་མ༎
དཀོར་ནོར་སྲུང་བའི་བྱེད་པོ་ཀུན་ལ་རབ་ཏུ་དང་བས་བདག་ཕྱག་འཚལ༎
གནོད་སྦྱིན་གཏེར་གྱི་རྒྱ་མཚོ་ཆེ་ལས་དགོས་འདོད་ནོར་བུའི་མཆོག་སྦྱིན་པའི༎
རྣམ་མང་ཐོས་སྲས་ལྷ་མོར་བཅས་པ་གང་དག་བུ་མང་ལྡན་པའི་ཚོགས༎
ཐུགས་རྗེའི་གདེངས་ཀ་རྣམ་པར་གཡོ་ཞིང་བྱམས་པའི་ཕྱག་གིས་ཉུག་མཛད་པའི༎
དེ་དག་ཀུན་ལ་གུས་པས་འདུད་དོ་འབྲུ་ནོར་ལོངས་སྤྱོད་ཆར་དུ་ཕོབ༎
དཔལ་ལྡན་བླ་མའི་བྱིན་རླབས་སྤྲིན་འཁྲིགས་ཡི་དམ་དངོས་གྲུབ་ཆར་རྒྱུན་འབེབས༎
མཁའ་འགྲོའི་འཕྲིན་ལས་འབྲས་བུ་གཡུར་ཟ་ཆོས་སྐྱོང་སྲུང་མའི་ར་བ་བརྟན༎
དུས་གསུམ་དགེ་བའི་བཀྲ་ཤིས་གཡང་འཁྱིལ་ཕུན་ཚོགས་ཕྱོགས་ལས་རྣམ་རྒྱལ་བའི༎
གཡར་དམ་གཉན་པོ་འགྲུབ་པར་མཛོད་ཅིག་སྐྱབས་འོས་རྣམས་ཀྱིས་མཐུན་འགྱུར་མཛོད༎
ཅེས་རྡོ་རྗེའི་ཆོས་སྐྱོང་བའི་སྲུང་མ་རྣམས་ལ་མངོན་པར་ཡིད་ཆེས་པའི་བསྟོད་པ་འདི་ནི་ཕྲན་རང་དབུས་བསྒྲོད་པའི་སྐབས་དངོས་རྫས་འགའ་ཞིག་རྐུན་པོས་བརྐུས་པ་ཕྱིར་འབྱོར་བས་རྐྱེན་བྱས་པས་མཆེད་གྲོགས་ངེས་དོན་ནོར་བུ་ནས་ཅི་ལྟར་བསྐུལ་བའི་ངོར་མོད་ཁམས་ཀྱི་བཙུན་པ་རྒྱལ་སྲས་གཞན་ཕན་མཐའ་ཡས་སུ་འབོད་པས་ཞེའུ་ཉིན་རྫོང་དགོན་ཞོལ་དུ་ཤར་མར་སྤེལ་བ་འདིས་ཀྱང་བསྟན་དགྲ་མ་ལུས་པ་ཚར་གཅོད་པར་གྱུར་ཅིག དགེའོ།
མངོན་བསྟོད་འདི་མཛད་པ་པོ་ནི་རྒྱལ་སྲས་གཞན་ཕན་མཐའ་ཡས་ནི་རྫོགས་ཆེན་རིན་པོ་ཆེ་སྐུ་ཕྲེང་བཞི་པ་དང་། རྡོ་གྲུབ་ཆེན་ཀུན་བཟང་གཞན་ཕན། འཇིགས་མེད་རྒྱལ་བའི་མྱུ་གུ། རྡོ་བླ་འཇིགས་མེད་སྐལ་བཟང་སོགས་ཀྱི་སློབ་མ་ཡིན། ཁོང་ནི་སྔ་འགྱུར་རྙིང་མའི་བསྟན་པ་སྤྱི་དང་ལྷག་པར་ཡང་རྫོགས་ཆེན་དགོན་ལ་བྱས་རྗེས་ཧ་ཅང་ཆེ་བའི་བླ་མ་ཞིག་རེད། དེ་ཡང་ཐོག་མར་རྫོགས་ཆེན་དགོན་པ་ས་ཡོམ་གྱིས་བཤིག་སྐབས་སུ་བསྐྱར་བཞེངས་ཕྱག་ལས་རྒྱ་ཆེར་གནང་བ་དང་། ལྷག་པར་ཡང་༡༨༤༨ལོར་རྫོགས་ཆེན་ཤྲི་སེང་ཧ་ཞེས་འབོད་པའི་སྔ་འགྱུར་བའི་ཐོས་བསམ་གྱི་ལྟེ་གནས་ཆེན་པོ་དེ་གསར་འཛུགས་གནང་ནས་སྔ་འགྱུར་རྙིང་མའི་གཞུང་ལུགས་སློབ་གཉེར་གྱི་ཕྱོགས་གོང་འཕེལ་ཆེན་པོ་བྱུང་ཡོད། ཁོང་གི་སློབ་མ་གྲགས་ཅན་རྣམས་ནི་རྫ་དཔལ་སྤྲུལ་རིན་པོ་ཆེ། རྫོགས་ཆེན་མཁན་པོ་པདྨ་རྡོ་རྗེ། མདོ་མཁྱེན་བརྩེ་ཡེ་ཤེས་རྡོ་རྗེ་སོགས་བྱུང་ཡོད། གཤམ་དུ་བཀོད་པའི་ཆོས་སྐྱོང་མངོན་བསྟོད་འདི་ནི་སྙན་ངག་མེ་ལོང་མ་ལས་བཤད་པའི་ཉམས་བརྒྱད་དང་ཕལ་མོ་ཆེ་གཟུགས་ཅན་གྱི་རྒྱན་དང་སྦྱར་ཡོད་པས་ཀློག་པ་པོའི་ཡིད་ལ་སྙན་ངག་གི་ཉམས་འགྱུར་ཟབ་མོ་སྦྱིན་པ་ཞིག་ཡིན། མངོན་བསྟོད་འདི་སྙིང་ཐིག་གི་དགོན་སྡེ་ཚོས་ཆོས་སྤྱོད་གསོལ་མཆོད་སྐབས་རྒྱུན་འདོན་གནང་གིན་ཡོད།
No comments:
Post a Comment
ཁྱེད་ཀྱི་དགོངས་ཚུལ་གླེང་བར་རེ་སྒུག་ཡོད།