དེང་དུས་སུ་གནས་བསྟན་སྡེ་བའི་ལུགས་ལས་མཆེད་པའི་ནང་པ་སངས་རྒྱས་པའི་སྤྱི་ཚོགས་ཕལ་མོ་ཆེའི་བསྟན་རྩིས་ལས་རིང་ལུགས་སུ་བཞེད་པའི་སངས་རྒྱས་མྱ་ངན་ལས་འདས་པ་དང་སངས་རྒྱས་པའི་དུས་ཆེན་དེ་ཟླ་བ་འདིའི་ནང་དུ་ཁེལ་ཡོད་པ་རེད། དེ་ཡང་ཟླ་བ་ཉ་གང་བའི་ཉིན་མོ་དེར་འཛམ་གླིང་གི་ཕྱོགས་མཐའ་སྣ་ཚོགས་ན་གནས་པའི་ནང་པ་སངས་རྒྱས་པ་ཚོས་དུས་ཆེན་བསྲུང་བརྩི་བྱས་ཡོད་རེད། དུས་ཆེན་བརྩི་བསྲུང་ཞུ་སྟངས་ནི་རང་རང་ལ་སྲོལ་ལུགས་སྣ་ཚོགས་པ་ཞིག་ལོ་ལྟར་རྒྱུན་དུ་ཡོད།
ལོ་འདིའི་དུས་ཆེན་ལ་དམིགས་བསལ་གྱིས་དོ་སྣང་བྱ་འོས་པ་དང་། གླེང་རིན་ཡོད་པ། རྗེས་སུ་ཡི་རང་གི་གནས་སུ་གྱུར་པའི་གསར་འགྱུར་ཞིག་བྱུང་བ་དེ་ནི་ཤྲི་ལང་ཀས་དུས་ཆེན་འདི་ལ་གཏད་ནས་ནག་ཉེས་ཅན་གྱི་བཙོན་པ་སྐྱེས་པ་༨༤༥དང་བུད་མེད་༡༣བཙོན་ཁང་ལས་བཏོན་ཡོད་པ་རེད།
བཙོན་གྲོལ་ཐོབ་པའི་མི་དེ་དག་གི་ནང་དུ་སྐད་གྲགས་ཅན་གྱི་དམག་དཔོན་ཟུར་བ་དང་སྲིད་འཛིན་འགྲན་བསྡུར་ལས་ཕམ་པའི་སྐུ་ཞབས་ས་རཏ་ཕོན་སེ་ཁ་Sarath Fonsekaལགས་ཀྱང་ཡོད་པ་རེད། སྐུ་ཐབས་ཕོན་སེ་ཁ་ལགས་ཀྱིས་དམག་སྒར་སྤྱི་ཁྱབ་པ་བྱས་ནས་༢༠༠༩ཟླ་བ་ལྔ་པའི་ནང་དུ་ཏ་མིལ་སྟག་ཚོགས་ཀྱི་ཁ་བྲལ་རིང་ལུགས་ངོ་ལོག་དྲག་གནོན་བྱས་ནས་མི་ལོ་༣༧རིང་གི་ནང་འཁྲུགས་མཇུག་དྲིལ་བས་བྱས་རྗེས་ཅན་གྱི་མི་ཞིག་ཀྱང་ཡིན་སྟབས་ད་ཐེངས་གློད་གྲོལ་བྱུང་བ་ནི་དགའ་བསུ་ཞུ་འོས་པ་ཞིག་ཏུ་གྱུར་ཡོད།
No comments:
Post a Comment
ཁྱེད་ཀྱི་དགོངས་ཚུལ་གླེང་བར་རེ་སྒུག་ཡོད།