དེང་དུས་ཀྱི་འཇིག་རྟེན།

རྡོ་རྗེ་ཚེ་སྲུང་གིས་བྲིས།

ཁང་བ་མང་དུ་མང་དུ་གྱུར།།

སྡོད་ཁྱིམ་ཆུང་དུ་ཆུང་དུ་གྱུར།།

ཆུ་ཚོད་འཁོར་ལོ་ཇེ་མང་རེད།།

དུས་ཚོད་ཁོམ་པ་ཇེ་ཉུང་རེད།།

ཤེས་ཚད་ལག་ཁྱེར་མཐོ་རུ་སོང་།།

བསམ་ཤེས་བྱེད་པ་ཉུང་དུ་སོང་།།

མི་ཡི་གྲངས་འབོར་མང་དུ་སོང་།།

མི་ཆོས་བཟང་པོ་ཉུང་དུ་སོང་།།

ཟླ་བའི་སྟེང་དུ་ལྟད་མོ་བལྟས།།

ཁྱིམ་མཚེས་ཚང་ལ་ཆ་རྒྱུས་མེད།།

བཟའ་སྒྲིག་ཐེང་མ་དགུ་ལ་བྱས།།

བརྩེ་བ་ངོ་མར་ཉམས་མྱོང་མེད།།

གྲོགས་པོའི་གྲངས་ཀ་མང་དུ་སོང་།།

སྤུས་ཀ་ཡོད་པ་ཉུང་དུ་སོང་།།

ཆང་རག་གོང་ཆེན་མང་དུ་སོང་།།

ཆུ་གཙང་བཏུང་བ་ཉུང་དུ་སོང་།།

ཡོང་སྒོའི་རྣམ་གྲངས་མང་དུ་སོང་།།

བདེ་བར་སྡོད་དུས་ཉུང་དུ་སོང་།།