མ་བུ་བར་གྱི་ཁ་རྩོད། ༼༣༽

མས། ཁྱོད་ལ་ཨ་ཞང་དྲིན་ཅན་གྱིས་ཡི་གེ་བསླབས། གཟན་ཤམ་བསྐོན། གྲྭ་ས་ལ་ཁྲིད་སོང་ང་། ཁྲེལ་ངོ་ཚ་མེད་མཁན་ཁྱོད་ཀྱིས་དེ་ཚོའི་དྲིན་ལ་བསམ་བློ་རེ་ཡང་གཏོང་མ་ཤེས་ནི་ཨེ་རེད།

མ་བུ་བར་གྱི་ཁ་རྩོད། ༼༢༽

མས། གྲྭ་བ་བྱས་ནས་བསྡད་ན་གྲུབ་འབྲས་ཚེ་ཕྱི་མ་ལ་ལོས་སྨིན། ཡིན་ན་མིན་ན་ད་ལྟ་མྱིག་གིས་རིག་ས་མཐོང་ས་འདི་ནས་ཐོན་ཅི་དགོས།

བུས། དེ་དགོས་ནི་རེད། སངས་རྒྱས་ཟེར་བ་དེ་མྱི་ཞིག་ཉི་མ་ནས་ཉི་མ། ཟླ་བ་ནས་ཟླ་བ། ལོ་ནས་ལོ་བཞིན་དུ་རང་གི་སེམས་ཐོག་གི་འདོད་ཆགས་ཞེ་སྡང་ཇེ་ཆུང་ལ་སོང་། ཤེས་རབ་སྙིང་རྗེ་ཇེ་ཆེ་ལ་སོང་ནས་སངས་རྒྱས་དགོས་ནི་རེད་མ་གཏོགས་ཟླ་བ་དང་ལོ་ཅི་ཙམ་སོང་ཡང་བཟང་སྐྱེད་སྐར་མ་གང་མེད་ན་ཉི་མ་གཅིག་ལ་སངས་རྒྱས་ཟེར་ནས་ལྷ་འབབ་འབབ་བྱེད་ཡོང་ནི་ཞིག་མ་རེད།

མ་བུ་བར་གྱི་ཁ་རྩོད། ༼༡༽

མས། ད་ཁྱོད་ཡག་པོ་ཞིག་བྱས་ནས་བསྡད་ཡོད་ས་མེད་ཁི། ད་ཁྱོད་གྲྭ་བ་ཞིག་ཡིན་ས་མེད་ཁི་ཨ།

བུས། གྲྭ་བ་མིན་ད་ཡག་པོ་བྱས་ནས་བསྡད་ཡོད། ང་གྲྭ་བ་ལོག་རྒྱུ་བོ་དེ་ངས་བསམ་བློ་བཏང་ནས་ཐག་བཅད་ནི་ཡིན་མ་གཏོགས་ང་ལ་བར་ཆད་བརྒྱུགས་བཞག་པ་འདྲ་ཅི་ཡང་མ་རེད། དེ་ཡིན་དུས་ད་རུང་ཡིན་ན་ཡང་ངས་ཐག་ཡག་པོ་ཞིག་བཅད་ཡོད་ཁི་བསམ་ཁི།

གྲྭ་བ་ལོག་པའི་སྔ་གཞུག

༼ང་དང་མ་རྒན་གཉིས་ཀྱི་རྩོད་གླེང་ཞིག་དུམ་བུ་ཁ་ཤས་ལ་བགོས་ནས་རིམ་པས་གཏོང་གི་ཡིན།༽

སྔོན་གླེང་ཐུང་ངུ་ཞིག
འདི་ནི་ངའི་མ་རྒན་དང་ངེད་གཉིས་བར་ལ་ཁ་པར་བརྒྱུད་ནས་བྱུང་བའི་གླེང་མོལ་དུམ་བུ་ཞིག་རེད། ངས་སྒྲ་དཔར་འཕྲུལ་ཆས་ལ་སྐབས་དེའི་གླེང་མོལ་གྱི་སྒྲ་བཅུག་ཡོད་ཀྱང་ངའི་ཕྱོགས་ཀྱི་སྐད་ཆ་མ་གཏོགས་མ་རྒན་གྱི་སྐད་འཇུག་ཐུབ་མེད་སྟབས་མ་རྒན་གྱི་སྐད་ཆའི་ཚིག་ཟིན་ཅི་བཞིན་འབྲི་ཐུབ་མེད། ཡིན་ན་ཡང་མོ་རང་གིས་བཤད་པའི་སྐད་ཆའི་ནང་དོན་ཆད་མེད་དུ་བཀོད་ཡོད་ཐོག་སྐད་ཆའི་གོ་རིམ་དང་བརྗོད་ཚིག་བེད་སྤྱད་སྟངས་མང་པོ་ཞིག་ཕལ་ཆེར་ཅི་མ་ཅི་བཞིན་དུ་འབྲི་ཅི་ཐུབ་བྱས་ཡོད། ངའི་ཕྱོགས་ཀྱི་སྐད་ཆའི་ནང་དོན་ལ་ཆད་ལྷག་གང་ཡང་མེད་མོད་མཚམས་རེར་བརྗོད་ཚིག་གཅིག་བསྐྱར་བཟློས་ཡང་བཟློས་བྱས་པ་དང་། མཚམས་རེར་ངས་དབུས་སྐད་ལྟ་བུ་ཞིག་བཤད་ཤོར་བ་མོས་མ་གོ་བས་གསལ་བཤད་བྱེད་དགོས་བྱུང་བ་ཁ་ཤས་ཡོད་པ་དེ་ཚོ་བཀོད་མེད།